डॉ. अशोक बालगुडे
पुणे: सोन्याच्या दराला लागलेली घसरण थांबण्याचे नाव घेत नाही. दिल्लीच्या सराफा बाजारात मंगळवारी सोन्याचा दर तब्बल २,७०० रुपयांनी घसरून १ लाख ५८ हजार २०० रुपये प्रति १० ग्रॅम झाला. गेल्या पाच सत्रांत सोन्याच्या दरात ८,९०० रुपयांची घसरण झाली आहे.
२५ ऑगस्टला १ लाख ६७ हजार १०० रुपये असलेले सोने पाच दिवसांत जवळपास नऊ हजार रुपयांनी स्वस्त झाले. २७ ऑगस्टला १,५०० रुपये, २८ ऑगस्टला २,००० रुपये, ३१ ऑगस्टला २,७०० रुपये, तर मंगळवारी पुन्हा २,७०० रुपयांची घट झाली. सोमवारी १० ग्रॅम सोन्याचा दर १ लाख ६० हजार ९०० रुपये होता.
सोन्याबरोबरच चांदीच्या दरातही मोठी घसरण झाली. चांदी ५,००० रुपयांनी कमी होऊन २ लाख ४० हजार ५०० रुपये प्रति किलो झाली. एका दिवसातील या घसरणीमुळे ग्राहक आणि गुंतवणूकदारांचे लक्ष आता दराच्या पुढील हालचालींकडे लागले आहे.
जागतिक बाजारातील विक्रीचा दबाव, अमेरिकेतील व्याजदरांबाबतच्या अपेक्षा आणि महागाईची चिंता यामुळे सोन्याच्या किमतीवर दबाव निर्माण झाला आहे. सुरक्षित गुंतवणुकीचे साधन मानल्या जाणाऱ्या सोन्याच्या दरात सलग पाच दिवस झालेली घट त्यामुळे महत्त्वाची मानली जात आहे.
