पुणे: पुणे शहरात गुन्हेगारीच्या घटना वाढत असताना आता पोलिसांच्या सुरक्षाव्यवस्थेबाबतही गंभीर प्रश्न निर्माण झाला आहे. पोलिसांच्या ताब्यात असलेली शस्त्रे चक्क मुद्देमाल कक्षातून चोरीला गेल्याचा प्रकार समोर आला आहे. बंडगार्डन पोलीस ठाण्याच्या हद्दीत ही घटना घडली असून, या प्रकरणी एका व्यक्तीला पोलिसांनी अटक केली आहे.
पोलिसांच्या माहितीनुसार, शनिवारी दुपारी सुमारे 12 वाजता एका फिरस्त्याने सेंट्रल बिल्डिंगसमोरील इमारतीत असलेल्या मुद्देमाल कक्षातून 7 पिस्तुले लंपास केली. त्यानंतर तो पिस्तुले घेऊन परिसरात फिरत होता. रात्री बंडगार्डन पोलीस ठाण्याजवळ आल्यानंतर त्याने एका व्यक्तीला पिस्तुल दाखवत ‘हँड्स अप’ करण्यास सांगितले. पोलीस ठाण्याच्या समोरच घडलेल्या या प्रकारामुळे परिसरात एकच खळबळ उडाली.
घटनेची माहिती मिळताच पोलिसांनी संशयिताला ताब्यात घेऊन चौकशी केली. चौकशीत त्याने पिस्तुले चोरी केल्याचे मान्य केल्याचे पोलिसांनी सांगितले. त्यावेळी त्याच्याकडील पिशवीत 6 पिस्तुले होती. मात्र, काही वेळाने दुसऱ्या एका व्यक्तीने ती पिशवी घेऊन गेल्याचे समोर आले.
यानंतर पोलिसांनी परिसरातील CCTV फुटेज तपासून पिशवीचा शोध सुरू केला. तपासादरम्यान जनरल पोस्ट ऑफिस परिसरातील झाडीत ही पिशवी आढळून आली. त्यामध्ये असलेली 6 पिस्तुलेही पोलिसांना सुरक्षित स्थितीत मिळाली. त्यामुळे चोरीला गेलेल्या सर्व 7 पिस्तुलांचा शोध लागला आहे.
मिळालेल्या माहितीनुसार, ही शस्त्रे 2022 मध्ये झालेल्या एका पोलिस कारवाईत जप्त करण्यात आली होती. त्यानंतर ती मुद्देमाल कक्षात सुरक्षित ठेवण्यात आली होती. पोलिसांच्या ताब्यातील शस्त्रेच चोरीला गेल्याने या घटनेने सुरक्षा व्यवस्थेवर प्रश्नचिन्ह निर्माण केले आहे.
या प्रकरणी राकेशकुमार संजयकुमार चिटेकर याच्याविरोधात कारवाई करण्यात आली असून त्याला अटक करण्यात आली आहे. बंडगार्डन पोलीस या घटनेचा पुढील तपास करत आहेत.
