लोणी काळभोर, ता. 2 : थेऊर (ता. हवेली) परिसरात मध्यरात्री पैशांवर रमीचा जुगार सुरू असल्याची माहिती मिळताच लोणी काळभोर पोलिसांच्या तपास पथकाने छापा टाकून पाच जणांना रंगेहाथ पकडले. या कारवाईत 109 कागदी पत्ते आणि 11 हजार 570 रुपयांची रोख रक्कम जप्त करण्यात आली आहे.
लाला शंकर पवार (वय 42), रामा साहेबराव पवार (वय 30), पिनु मरीबा सोनावणे (वय 36), रामा येलप्पा पवार (वय 36) आणि विठ्ठल महादेव जाधव (वय 60) अशी गुन्हा दाखल करण्यात आलेल्यांची नावे आहेत. याप्रकरणी पोलीस अंमलदार राहुल राजाराम कर्डिले यांनी सरकारच्या वतीने लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, लोणी काळभोर पोलिस ठाण्याचे तपास पथक 29 ऑगस्टच्या रात्रीपासून थेऊर परिसरात पेट्रोलिंग करत होते. यावेळी आलीफ नगर, थेऊर येथे अमृत पांडू पवार यांच्या घरासमोर काही जण पैशांवर रमीचा जुगार खेळत असल्याची माहिती पोलिसांना मिळाली. वरिष्ठांच्या आदेशानंतर पोलिस पथकाने पंचांसह घटनास्थळी जाऊन मध्यरात्री साडेबाराच्या सुमारास छापा टाकला.
या कारवाईत पोलिसांनी घटनास्थळावरून 109 कागदी पत्ते, पत्त्यांचे एक रिकामे खोके आणि 11 हजार 570 रुपयांची रोख रक्कम जप्त केली. पंचांसमक्ष मुद्देमाल ताब्यात घेऊन सील करण्यात आला असून, संबंधित पाच जणांविरोधात कायदेशीर कारवाई करण्यात आली आहे. ही कारवाई लोणी काळभोर पोलिस ठाण्याच्या तपास पथकाने केली. परिसरातील अवैध जुगाराच्या प्रकारांवर पोलिसांनी कारवाईचा बडगा उगारल्याने जुगार खेळणाऱ्यांमध्ये खळबळ उडाली आहे.
