पुणे : पुण्यातील घोरपडी परिसरात भाजपचे ज्येष्ठ नेते आणि माजी राज्यमंत्री दिलीप कांबळे यांच्या वाहनांवर अज्ञात हल्लेखोरांनी हल्ला केल्याची खळबळजनक घटना घडली आहे. बी. टी. कवडे रस्त्यावरील ‘सिटाडेल एम्प्रेस सोसायटी’मध्ये ही घटना घडली असून, हल्लेखोरांनी कांबळे यांच्या मालकीच्या दोन महागड्या चारचाकी वाहनांची दगड आणि बांबूने प्रचंड तोडफोड केली.
समोर आलेल्या माहितीनुसार, हा प्रकार अत्यंत नियोजनबद्ध पद्धतीने घडवून आणल्याचे तपासात समोर आले आहे. हल्लेखोरांनी घटना घडण्यापूर्वी कांबळे यांच्या घराजवळील 3 सीसीटीव्ही कॅमेऱ्यांचे वायर कापले, जेणेकरून त्यांची ओळख पटू नये. विशेष म्हणजे, सोसायटीत अनेक गाड्या उभ्या असताना हल्लेखोरांनी केवळ दिलीप कांबळे यांच्याच वाहनांना लक्ष्य केले.
सोमवारी रात्री 8 ते 9 वाजेच्या सुमारास कांबळे कुटुंब कामानिमित्त बाहेर गेले होते. ते परत आल्यानंतर त्यांना गाड्यांची मोडतोड झाल्याचे दिसून आले. “हा थेट माझ्यावर आणि माझ्या कुटुंबावर हल्ला करण्याचा प्रयत्न असावा,” असा संशय व्यक्त करत दिलीप कांबळे यांनी तीव्र संताप व्यक्त केला आहे.
या घटनेनंतर दिलीप कांबळे यांनी तात्काळ मुंढवा पोलीस ठाण्यात तक्रार नोंदवली आहे. सत्ताधारी पक्षाच्या माजी मंत्र्याच्या घराजवळच असा प्रकार घडल्याने शहरातील कायदा व सुव्यवस्थेवर प्रश्नचिन्ह उपस्थित होत आहे. सध्या मुंढवा पोलीस परिसरातील इतर मार्गांवरील सीसीटीव्ही फुटेज तपासून आरोपींचा कसून शोध घेत आहेत.
हा प्रकार राजकीय वैमनस्यातून झाला की अन्य काही कारणांमुळे, याचा तपास आता पोलीस करत आहेत
