पुणे: पुण्यातील विमाननगर परिसरात हॉटेलचा कोणताही परवाना नसताना पहाटेपर्यंत संगीत पार्टी आयोजित करून मद्यविक्री केल्याचा प्रकार समोर आला आहे. एअरपोर्ट रोडवरील बॅक बेंचर्स हॉटेलमध्ये २४ ऑगस्ट रोजी पहाटे साडेचारपर्यंत मोठ्या आवाजात संगीत सुरू होते. यावेळी सहा तरुणींसह सुमारे ३० तरुण मद्यपान करून नाचत असल्याचे पोलिसांना आढळून आले.
या प्रकरणी हॉटेल मालक नितीन दिवाकर जाधव, युवराज प्रमोद नायडू, मॅनेजर दीपक रामचंद्र कांबळे यांच्यासह हॉटेलमधील कर्मचाऱ्यांवर गुन्हा दाखल करण्यात आला आहे. स्नुकर टेबलचा व्यवसाय करण्यासाठी असलेल्या ठिकाणी पार्टी आयोजित करून बेकायदेशीरपणे मद्यपुरवठा करण्यात आल्याचे पोलिसांच्या कारवाईत समोर आले.
विमाननगर पोलीस रात्रीच्या गस्तीवर असताना बॅक बेंचर्स हॉटेलमध्ये पहाटेपर्यंत मद्यविक्री सुरू असल्याची माहिती मिळाली. पोलीस उपनिरीक्षक नवनाथ क्षीरसागर यांनी याबाबत वरिष्ठ अधिकाऱ्यांना माहिती दिल्यानंतर अतिरिक्त पोलीस बंदोबस्तासह पहाटे साडेचारच्या सुमारास हॉटेलवर छापा टाकण्यात आला.
पोलिसांना हॉटेलमध्ये मोठ्या आवाजात स्पीकर सुरू असल्याचे आणि काही पुरुष व महिला नाचत असल्याचे आढळले. चौकशी केली असता हॉटेल मालकाकडे हॉटेल चालवण्याचा तसेच मद्यविक्री आणि ग्राहकांना मद्य पुरवण्याचा कोणताही परवाना नसल्याचे समोर आले.
कारवाईदरम्यान पोलिसांनी उपस्थित असलेल्या २४ पुरुषांना वैद्यकीय तपासणीसाठी ससून रुग्णालयात पाठवले. तसेच सहा तरुणींची वाहतूक पोलिसांकडील ब्रेथ अॅनालायझरच्या माध्यमातून तपासणी करण्यात आली. या तपासणीत त्यांचे अहवाल पॉझिटिव्ह आल्याची माहिती पोलिसांनी दिली.
पोलिसांनी हॉटेलमधून ७ हजार ६९० रुपयांच्या मद्याच्या बाटल्या, इतर साहित्य आणि साऊंड सिस्टीम जप्त केली आहे. हॉटेल मालक आणि कर्मचाऱ्यांविरोधात गुन्हा दाखल करण्यात आला असून, पोलीस उपनिरीक्षक कांतीलाल गुंड या प्रकरणाचा तपास करीत आहेत.
