पुणे: पुण्यातील लोहगाव परिसरातून धक्कादायक घटना समोर आली आहे. येथे पत्नीने नांदण्यास नकार दिल्याचा राग मनात धरून पतीने गळा चिरून पत्नीचा खून केल्याची धक्कादायक घटना घडली आहे. ही घटना रविवारी (२७ जुलै) दुपारच्या सुमारास घडली. या प्रकरणी आरोपी पतीला अटक करण्यात आली आहे.
ममता जाधव (वय २१ ) असे खून झालेल्या महिलेचे नाव आहे. तर प्रेम जाधव (वय २७) असे अटक करण्यात आलेल्या आरोपीचे नाव आहे. याप्रकरणी रेश्मा राठोड यांनी विमानतळ पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, २०२० मध्ये ममता व प्रेम यांचे लग्न झाले होते. पती प्रेमला दारूचे व्यसन होते. यातून त्यांचे वाद होत असत. त्याला अनेक वेळा समजावूनही त्याने दारू सोडली नाही. यानंतर वाद झाल्याने ममता गेल्या काही महिन्यांपासून आपल्या माहेरी, लोहगाव परिसरात राहण्यास गेल्या होत्या.
प्रेम हा पत्नीच्या संपर्कात होता. तो ममताला पुन्हा नांदवण्याच्या तयारीत होता. मात्र ममताने त्याला सांगितले होते की, त्याने दारू सोडल्याशिवाय ती नांदायला परत येणार नाही.
दरम्यान, रविवारी(२७ जुलै) रोजी दुपारी प्रेम जाधव ममताला भेटण्यासाठी लोहगाव परिसरातील तिच्या घरी गेला असता पुन्हा एकदा दोघांमध्ये वाद झाला. तेंव्हा प्रेमने आपल्या जवळील चाकू काढून ममताच्या गळ्यावर वार केले.
आरडाओरड झाल्याने घराबाहेर बसलेल्या रेश्मा राठोड यांनी घरात जाऊन पाहिले असता प्रेम जाधव हा पत्नीवर चाकूने वार करत असताना दिसून आला. त्यावेळी रेश्मा यांनी त्याला अडवण्याचा प्रयत्न केला असता, त्यांच्यावरही चाकूने वार करून प्रेम जाधव घटनास्थळावरून पळून गेला.
सदर घटनेमुळे लोहगाव परिसरात एकच खळबळ उडाली असून पोलिसांनी तत्काळ तपासाची चक्रं फिरवून आरोपी प्रेम जाधव याला अटक केली आहे. पुढील तपास विमानतळ पोलीस करत आहेत.
