Pune Accident News: पुणे: वानवडी आणि महंमदवाडी परिसरातील क्लाऊड 9 सोसायटीजवळ रविवारी सायंकाळी एक दुर्दैवी अपघात (Accident) घडला. या अपघातात 19 वर्षीय तरुणाचा मृत्यू झाला आहे. आरिझ शेख असे मृत तरुणाचे नाव असून तो कोंढवा येथील रहिवासी होता. या प्रकरणी वानवडी पोलिसांनी टँकर चालक रवींद्र भीमराव दनाने (वय 34) याला अटक केली आहे.
मिळालेल्या माहितीनुसार, आरिझ हा फुटबॉल खेळात प्रावीण्य मिळवलेला खेळाडू होता. त्याने राष्ट्रीय स्तरावरही खेळले होते. काही दिवसांपूर्वीच त्याची 12 वीची परीक्षा पूर्ण झाली होती. त्यानंतर तो कुटुंबासोबत केरळ येथे फिरण्यासाठी गेला होता. रविवारी सकाळी तो पुण्यात परतला आणि सायंकाळी मित्राला भेटण्यासाठी दुचाकीवरून घराबाहेर पडला.
महंमदवाडी परिसरातील क्लाऊड 9 सोसायटीजवळ तो पोहोचला असताना समोरून येणाऱ्या भरधाव पाण्याच्या टँकरने त्याच्या दुचाकीला जोरात धडक दिली. या धडकेत तो रस्त्यावर फेकला गेला आणि गंभीर जखमी झाला. स्थानिकांनी त्याला तातडीने वानवडी येथील रुग्णालयात नेले, मात्र डॉक्टरांनी तपासणी करून त्याला मृत घोषित केले.
या घटनेमुळे परिसरात शोककळा पसरली आहे. एका तरुण आणि गुणी खेळाडूचा असा दुर्दैवी अंत झाल्याने नागरिकांमध्ये हळहळ व्यक्त होत आहे. अपघातानंतर पोलिसांनी तात्काळ कारवाई करत टँकर चालकाला ताब्यात घेतले आहे. पुढील तपास सुरू असून शहरातील टँकरच्या वेगामुळे वाढणाऱ्या अपघातांबाबत चिंता व्यक्त केली जात आहे.
