Pune Traffic Police: पुणे : पुणे (Pune) शहरातील वाहतूक नियमांचे उल्लंघन करून दंड न भरणाऱ्या वाहनधारकांविरुद्ध आता कडक कारवाई केली जाणार आहे. पुणे वाहतूक शाखेने थकीत दंड वसुलीसाठी (Recovery of outstanding fines) विशेष मोहीम सुरू केली आहे. शहरात सुमारे 19 लाख प्रलंबित चलन असून जवळपास 400 कोटी रुपयांचा दंड बाकी आहे. ही रक्कम वसूल करण्यासाठी आता चालक परवाना निलंबित करण्याचा पर्याय वापरण्यात येणार आहे.
फक्त महिन्याभराचा कालावधी
वाहतूक पोलिसांनी दिलेल्या माहितीनुसार, 26 फेब्रुवारी ते 1 मार्च या कालावधीत थकीत दंड असलेल्या वाहनधारकांना त्यांच्या नोंदणीकृत मोबाईल क्रमांकावर संदेश पाठवले जातील. हे संदेश MHPECH-G या अधिकृत कोडवरून येतील. नोटीस मिळाल्यानंतर 30 दिवसांच्या आत दंड भरावा लागेल. मुदतीत दंड न भरल्यास संबंधित वाहनधारकांविरुद्ध पुढील कारवाई केली जाईल.
परवाना निलंबित करणार..
अधिकाऱ्यांनी सांगितले की, ठरलेल्या कालावधीत दंड न भरल्यास चालकाचा परवाना निलंबित करण्याचा प्रस्ताव प्रादेशिक परिवहन कार्यालयाकडे पाठवला जाईल. तसेच काही प्रकरणे न्यायालयात दाखल केली जाऊ शकतात. त्यामुळे वाहनधारकांनी वेळेत दंड भरावा, असे आवाहन करण्यात आले आहे.
दरम्यान, नोटीस पाठवण्याच्या प्रक्रियेत फसवणूक होऊ नये यासाठी नागरिकांनी सतर्क राहावे, असे पोलिसांनी सांगितले आहे. पोलीस कधीही APK फाईल पाठवत नाहीत किंवा OTP मागत नाहीत. संशयास्पद संदेश आल्यास त्यावर विश्वास ठेवू नये.
दंड भरण्यासाठी mahatrafficechallan.gov.in या अधिकृत संकेतस्थळाचा किंवा पुणे ट्रॅफिक पोलीस या अधिकृत मोबाईल ॲपचा वापर करता येईल. तसेच वाहतूक विभागाच्या कार्यालयात जाऊनही दंड भरता येणार आहे.
