Pune Crime: पुण्यातून एका व्यक्तीने नोकरीवरून काढून टाकल्याने टोकाचं पाऊल उचलल्याची घटना समोर आली आहे. नौकारीवरून काढून टाकल्यामुळे नैराश्यातून एका 50 वर्षीय व्यक्तीने गळफास घेऊन आत्महत्या केल्याची धक्कादायक घटना गुरुवारी (7 नोव्हेंबर) ला उघडकीस आली. आत्महत्येस प्रवृत्त केल्याप्रकरणी दोघांविरुद्ध आंबेगाव पोलीस ठाण्यात गुन्हा दाखल करण्यात आला आहे. (Pune Latest Crime News)
फिर्यादी यांचा आरोप काय?
मिळालेल्या माहितीनुसार, दीपक बोबडे (वय 50 वर्ष, रा. दळवीनगर, आंबेगाव बुद्रुक, पुणे) असे आत्महत्या केलेल्या व्यक्तीचे नाव आहे. मयात यांची पत्नी स्वाती बोबडे यांनी या प्रकरणी आंबेगाव पोलीस ठाण्यात तक्रार दिली आहे. त्यांच्या तक्रारीनुसार, अजित जाधव आणि रवींद्र राऊत नावाच्या दोन व्यक्तींविरोधात गुन्हा दाखल करण्यात आला आहे. फिर्यादीत आरोपींनी दीपकला त्रास दिल्याचे म्हटले आहे. त्यातून दिपकने आत्महत्या केली असा आरोप करण्यात आला आहे.
नैराश्यातून आत्महत्या
पोलिसांनी दिलेल्या माहितीनुसार, दीपक बोबडे हे पुण्यातील एका खासगी कंपनीत काम करत होते. आरोपींनी बोबडे यांना त्रास देऊन त्यांचा छळ केला. त्यानंतर नोकरीवरून काढून टाकले. नोकरी गमावल्यामुळे दीपक नैराश्यात गेले होते. याच नैराश्यातून त्यांनी गुरुवारी( 7 नोव्हेंबर) ला सातारा जिल्ह्यातील खंडाळा तालुक्यातील एका लॉजमध्ये जाऊन गळफास घेतला.
याप्रकरणी आंबेगाव पोलीस ठाण्यात गुन्हा दाखल करण्यात आला असून, या प्रकरणाचा अधिक तपास पोलीस करत आहेत. .
