पुणे: पुणे जिल्ह्यातील महामार्ग आणि प्रमुख रस्त्यांवर सातत्याने होणाऱ्या भीषण अपघातांच्या पार्श्वभूमीवर प्रशासनाने मोठे पाऊल उचलले आहे. जिल्ह्यातील अपघातांचा सखोल अभ्यास करून तब्बल 121 धोकादायक ठिकाणांची (ब्लॅक स्पॉट्स) यादी तयार करण्यात आली असून, त्यामध्ये पुणे-सोलापूर महामार्ग सर्वाधिक धोकादायक ठरला आहे. या महामार्गावर एकट्या 46 ब्लॅक स्पॉट्सची नोंद करण्यात आली आहे.
रस्ते अपघात रोखण्यासाठी आता रस्ते सुरक्षा पथकातील अधिकारी प्रत्यक्ष घटनास्थळी जाऊन पाहणी करणार आहेत. अपघातांची नेमकी कारणे शोधून तात्पुरत्या तसेच कायमस्वरूपी उपाययोजना सुचविण्याच्या सूचना प्रादेशिक परिवहन अधिकाऱ्यांनी ‘वायुवेग पथकां’ना दिल्या आहेत. पुणे जिल्ह्यातून अनेक महत्त्वाचे राष्ट्रीय आणि राज्य महामार्ग जात असल्याने या मार्गांवर सातत्याने गंभीर अपघात घडत असल्याचे प्रशासनाच्या निदर्शनास आले आहे.
रस्ते वाहतूक आणि महामार्ग मंत्रालयाच्या निकषांनुसार, सलग तीन वर्षांच्या कालावधीत सुमारे 500 मीटर परिसरात किमान 5 गंभीर अपघात होऊन 10 किंवा त्यापेक्षा अधिक जणांचा मृत्यू झालेल्या ठिकाणाला ‘ब्लॅक स्पॉट’ म्हणून घोषित केले जाते. अशा ठिकाणांवर विशेष उपाययोजना राबविण्यात येणार आहेत.
यासाठी परिवहन विभाग, सार्वजनिक बांधकाम विभाग, राष्ट्रीय महामार्ग प्राधिकरण (NHAI), पुणे आणि पिंपरी-चिंचवड महापालिका, एमएसआरडीसी तसेच पोलीस विभागाचे अधिकारी संयुक्तपणे प्रत्यक्ष पाहणी करणार आहेत. या कामासाठी आठ विशेष रस्ते सुरक्षा पथकांची स्थापना करण्यात आली असून, ही पथके जिल्हा वाहतूक शाखेच्या पोलिसांसोबत समन्वय साधून काम करणार आहेत.
प्रशासनाने सर्व संबंधित पथकांना 25 जूनपर्यंत पाहणी पूर्ण करून स्वाक्षरीसह सविस्तर अहवाल सादर करण्याचे आदेश दिले आहेत. त्यानंतर 29 जून रोजी होणाऱ्या रस्ते सुरक्षा समितीच्या बैठकीत या अहवालावर चर्चा करून तातडीच्या आणि दीर्घकालीन उपाययोजनांवर निर्णय घेतला जाणार आहे.
महामार्गनिहाय ब्लॅक स्पॉट्सची संख्या:
* पुणे-सोलापूर महामार्ग – 46
* पुणे-अहिल्यानगर महामार्ग – 33
* पुणे-बेंगळुरू महामार्ग – 13
* पुणे-पंढरपूर (जेजुरी रस्ता) – 7
* इतर प्रमुख मार्ग – 22
या ब्लॅक स्पॉट्सवर आवश्यक सुधारणा, वाहतूक व्यवस्थापन, इशारा फलक, रस्त्यांची दुरुस्ती आणि इतर सुरक्षाविषयक उपाययोजना राबवून अपघातांचे प्रमाण कमी करण्याचे प्रशासनाचे उद्दिष्ट आहे.
