पुणे: पुणेकरांसाठी एक महत्त्वाची बातमी समोर आली आहे. शहरातील डेक्कन आणि पेठ भागांना जोडणारा स्वर्गीय काकासाहेब गाडगीळ पूल, म्हणजेच ‘झेड ब्रिज’, दुरुस्तीच्या कामासाठी महिनाभर अंशतः बंद राहणार आहे. PMCने स्ट्रक्चरल ऑडिटनंतर हा निर्णय घेतला आहे.
10 एप्रिल ते 9 मे 2026 या कालावधीत पुलावर रात्रीच्या वेळी वाहतुकीवर पूर्ण बंदी असणार आहे. दररोज रात्री 11 वाजेपासून सकाळी 7 वाजेपर्यंत पुलावरील वाहतूक थांबवण्यात येईल. दिवसाच्या वेळेत मात्र वाहतूक सुरू राहणार आहे.
या कालावधीत पुलाचे एक्सपेंशन जॉइंट्स आणि बेअरिंग्ज बदलण्याचे महत्त्वाचे तांत्रिक काम केले जाणार आहे. पुलाची सुरक्षितता वाढवण्यासाठी आणि तो दीर्घकाळ टिकण्यासाठी ही दुरुस्ती आवश्यक असल्याचे प्रशासनाने सांगितले आहे.
जिल्हाधिकारी Jitendra Dudi यांच्या आदेशानुसार शहरातील धोकादायक पुलांचे ऑडिट करण्यात आले होते. त्यामध्ये 17 पुलांची यादी करण्यात आली होती. त्यापैकी खडकवासला आणि संभाजी पूल दुरुस्तीचे काम पूर्ण झाले असून आता झेड ब्रिजच्या कामाला सुरुवात होत आहे.
दरम्यान, रात्रीच्या वेळी वाहतूक बंद असल्याने नागरिकांना पर्यायी मार्गांचा वापर करण्याचे आवाहन करण्यात आले आहे. छत्रपती संभाजी पूल (लकडी पूल), भिडे पूल (नदीपात्रातील रस्ता खुला असल्यास) आणि नया पूल (नारायण पेठ) हे पर्यायी मार्ग उपलब्ध असतील.
पुणे महानगरपालिकेच्या प्रकल्प विभागाचे प्रमुख दिनकर गोजारे यांनी नागरिकांना सहकार्य करण्याचे आवाहन केले आहे. या दुरुस्तीमुळे काही काळ त्रास होणार असला तरी भविष्यात सुरक्षित आणि मजबूत पूल मिळणार असल्याचे त्यांनी स्पष्ट केले आहे.
