पुणे: पुण्यातील डेक्कन मेट्रो स्थानकाला जोडणाऱ्या पादचारी केबल ब्रिजच्या उभारणीचे काम सुरू झाल्यामुळे भिडे पुलावरील वाहतुकीत तात्पुरते बदल करण्यात आले आहेत. या कामामुळे शहरातील वाहतूक व्यवस्थेवर काही प्रमाणात परिणाम होणार असून नागरिकांनी पर्यायी मार्गांचा वापर करावा, असे आवाहन वाहतूक पोलिसांनी केले आहे.
मिळालेल्या माहितीनुसार, 22 जूनच्या मध्यरात्रीपासून 6 जुलैपर्यंत भिडे पुलावरील वाहतूक पूर्णपणे बंद ठेवण्यात येणार आहे. या कालावधीत पुलावरून कोणत्याही प्रकारची वाहतूक होणार नाही. त्यानंतर 7 जुलैपासून पुढील आदेश मिळेपर्यंत दररोज रात्री 11 ते सकाळी 6 वाजेपर्यंत पुलावरील वाहतूक बंद राहणार आहे. दिवसा मात्र नागरिकांना पुलाचा वापर करता येणार आहे.
वाहतुकीची कोंडी टाळण्यासाठी वाहतूक विभागाने विविध पर्यायी मार्ग निश्चित केले आहेत. टिळक चौक, खंडोजी बाबा चौक, जयंतराव टिळक पूल, गंधर्व चौक, ओंकारेश्वर पूल आणि एस. एम. जोशी पूल या मार्गांचा वापर करण्याचे आवाहन करण्यात आले आहे. दुचाकीस्वारांसाठी झेड ब्रिज हा पर्यायी मार्ग उपलब्ध ठेवण्यात आला आहे.
दरम्यान, नवले पूल परिसरातील सेवा रस्त्यांबाबतही महत्त्वाचा निर्णय घेण्यात आला आहे. या परिसराचा समावेश पुणे महापालिकेच्या हद्दीत झाल्यामुळे सेवा रस्त्यांच्या उभारणी आणि देखभालीची जबाबदारी आता महापालिकेकडे सोपवण्यात येणार आहे. यासाठी आवश्यक भूसंपादन, मोबदला वाटप आणि प्रशासकीय प्रक्रिया पालिकेमार्फत राबवण्यात येणार आहेत.
नवले पूल परिसरातील वाहतूक कोंडी कमी करण्यासाठी सेवा रस्त्यांचा प्रकल्प महत्त्वाचा मानला जात आहे. मात्र काही ठिकाणी भूसंपादन प्रक्रियेला स्थानिकांचा विरोध असल्याने कामात अडथळे निर्माण होत असल्याची माहिती समोर आली आहे.
नागरिकांनी वाहतूक नियमांचे पालन करून पोलिसांना सहकार्य करावे, असे आवाहन प्रशासनाकडून करण्यात आले आहे.
