पुणे: लोहगड किल्ल्यावरून दरीत कोसळून मृत्यू झालेल्या केतन अग्रवाल प्रकरणात दररोज नवे खुलासे समोर येत आहेत. या प्रकरणात केतनची होणारी पत्नी सिया गोयल हिला अटक झाल्यानंतर आता तिची सोशल मीडिया पोस्ट आणि केतनचा तिला प्रपोज करतानाचा व्हिडीओ सोशल मीडियावर मोठ्या प्रमाणात व्हायरल होत आहे.
मिळालेल्या माहितीनुसार, केतन अग्रवाल आणि सिया गोयल यांचे लग्न कुटुंबीयांनी ठरवले होते. नोव्हेंबर महिन्यात जयपूर येथे त्यांचा विवाहसोहळा पार पडणार होता. मात्र केतनच्या मृत्यूनंतर सियाने तिच्या वाढदिवशी सोशल मीडियावर एक भावनिक पोस्ट लिहिली होती. त्या पोस्टमध्ये तिने केतनसोबतचे फोटो आणि व्हिडीओ शेअर करत आपल्या भावना व्यक्त केल्या होत्या.
सियाने पोस्टमध्ये, “केतन, तू मला माझ्या वाढदिवशी सोडून गेलास. आपलं लग्न इतकं जवळ असताना तू मला का सोडून गेलास हे अजूनही मला समजत नाही. आपल्या भविष्यासाठी मी अनेक स्वप्नं पाहिली होती. माझ्या मनात असंख्य प्रश्न आहेत, पण त्यांची उत्तरं मला आता कधीच मिळणार नाहीत. मी तुझ्यावर खूप प्रेम केलं, तरीही तू मला का सोडून गेलास?” असे म्हटले होते. पोस्टच्या शेवटी तिने “Rest in Peace” असेही लिहिले होते.
View this post on Instagram
या पोस्टनंतर अनेकांनी तिच्याबद्दल सहानुभूती व्यक्त केली होती. मात्र आता या प्रकरणात तिचे नाव समोर आल्यानंतर हीच पोस्ट पुन्हा चर्चेचा विषय बनली आहे.
दरम्यान, केतनने सियाला प्रपोज केल्याचा एक व्हिडीओ देखील सोशल मीडियावर व्हायरल होत आहे. या व्हिडीओमध्ये दोघेही आनंदी दिसत असून त्यांच्या आयुष्यातील खास क्षण टिपलेले आहेत. त्यामुळे एकीकडे व्हायरल पोस्ट आणि दुसरीकडे समोर आलेल्या तपासातील माहिती यामुळे हे प्रकरण अधिक चर्चेत आले आहे.
सध्या या संपूर्ण प्रकरणाचा तपास सुरू असून पोलिसांकडून सर्व बाजूंनी चौकशी केली जात आहे.
