पुणे: राज्यात दुचाकीस्वारांसाठी हेल्मेट सक्तीचा नियम आधीपासून असला तरी आता त्याची अंमलबजावणी अधिक कडक करण्यात आली आहे. विशेष म्हणजे, कायद्याची अंमलबजावणी करणाऱ्या पोलीस कर्मचाऱ्यांनाही हेल्मेट वापरणे बंधनकारक करण्यात आले आहे. राज्य डीजीपी कार्यालयाने नुकतेच यासंदर्भात परिपत्रक जारी केले असून सर्व पोलीस आणि सरकारी कर्मचाऱ्यांनी दुचाकीवर प्रवास करताना हेल्मेट घालावे, असे स्पष्ट आदेश देण्यात आले आहेत.
पुणे शहरात या नियमाची अंमलबजावणी विशेष लक्ष केंद्रित करून केली जाणार आहे. हिम्मत जाधव यांनी दिलेल्या माहितीनुसार, पुण्यातील सर्व पोलीस कर्मचाऱ्यांसाठी हेल्मेट वापरणे सक्तीचे करण्यात आले आहे. कोणताही पोलीस कर्मचारी हेल्मेटशिवाय वाहन चालवताना आढळल्यास त्याच्यावर दंडात्मक कारवाई केली जाणार आहे. तसेच नागरिकांनीही अशा प्रकरणांची माहिती देण्याचे आवाहन करण्यात आले आहे.
यासाठी पुणे वाहतूक पोलिसांनी नागरिकांना PTP App चा वापर करण्यास सांगितले आहे. हेल्मेट न घातलेल्या पोलीस कर्मचाऱ्यांचा फोटो काढून, संबंधित वाहनाचा क्रमांक नोंदवून तो अॅपवर अपलोड करता येणार आहे. त्यानुसार संबंधितांवर कारवाई केली जाईल.
मागील 1 वर्षात राज्यात रस्ते अपघातांमध्ये 15000 पेक्षा जास्त लोकांचा मृत्यू झाला असून त्यापैकी सुमारे 7000 मृत्यू दुचाकीस्वारांचे आहेत. पुण्यासह मुंबई आणि नागपूर वगळता इतर भागात केवळ 20 टक्के लोक हेल्मेट वापरत असल्याचे समोर आले आहे. ही चिंताजनक बाब लक्षात घेऊन पोलिसांनी कठोर भूमिका घेतली आहे.
वाहतूक कायद्यातील कलम 194D नुसार हेल्मेट न घातल्यास 500 रुपये दंड आकारला जाणार आहे. तसेच नियम मोडणाऱ्या पोलीस कर्मचाऱ्यांची नोंद त्यांच्या सेवापुस्तकात केली जाणार असल्याचा इशाराही देण्यात आला आहे. त्यामुळे पुण्यात आता पोलिसांनी स्वतः आदर्श ठेवत नियमांचे पालन करणे अपेक्षित आहे.
