पुणे: हिंजवडीच्या आयटी पार्कमध्ये (Pune News) रोजची ट्रॅफिकची लढाई लढणाऱ्या पुणेकरांसाठी एक आनंदाची आणि एक काहीशी निराशेची बातमी आहे. हिंजवडी ते शिवाजीनगर या बहुप्रतिक्षित ‘पुणे मेट्रो लाईन ३’ (PMRDA Line 3) पूर्ण क्षमतेने सुरू होण्यासाठी आता आणखी काही महिने वाट पाहावी लागणार आहे. हा संपूर्ण मार्ग आता दोन टप्प्यांत सुरु केला जाईल, अशी महत्त्वाची घोषणा राज्याचे मुख्यमंत्री देवेंद्र फडणवीस यांनी केली आहे.
कसे असेल नवीन वेळापत्रक?
23 किलोमीटरचा हा संपूर्ण मार्ग एकाच वेळी सुरू न करता तो विभागला गेला आहे:
१. पहिला टप्पा: हिंजवडी ते बालेवाडी फाटा हा टप्पा मे 2026 मध्ये सुरु होईल.
२. दुसरा टप्पा: बालेवाडी फाटा ते शिवाजीनगर हा उर्वरित भाग जुलै 2026 मध्ये सुरु होऊ शकतो.
नेमकं काम कुठं अडलं?
‘पीएमआरडीए’ने (PMRDA) मार्च 2026 पर्यंत मेट्रो धावेल, असा शब्द पुणेकरांना दिला होता. मात्र, प्रत्यक्षात कामाचा वेग पाहता हा दावा फोल ठरला आहे. निम्म्याहून अधिक स्थानकांचे कामे अद्याप रेंगाळलेली आहेत. मेट्रो सुरू करण्यापूर्वी लागणारी सुरक्षा प्रमाणपत्रे आणि तांत्रिक चाचण्यांचीप्रक्रिया मोठी असते, त्यासाठी प्रशासनाला अधिक वेळ हवा आहे. पुणे मेट्रो लाईन 3 सुरु झाल्यास प्रवासाचा वेळ 45 मिनिटांनी वाचणार असल्यामुळे मेट्रो कधी सुरु होणार याची वाट पुणेकर आतुरतेने पहात आहेत.
