Pune News: पुणे: पुणे शहरात येत्या वर्षात जानेवारीमध्ये आंतरराष्ट्रीय सायकल स्पर्धा होणार आहे. आंतरराष्ट्रीय सायकल स्पर्धा Pune Grand Challenge साठी पालिकाने विशेष तयार केलेला रस्ता काही तासांतच निष्कृष्ट झाल्याची धक्कादायक घटना समोर आली आहे. स्वारगेटजवळील मित्रमंडळ चौकात नव्याने करण्यात आलेले डांबरीकरण काही तासही टिकले नाही. (Pune News)
महापालिकेच्या पथ विभागाकडून स्पर्धेसाठी एकूण 75 किलोमीटर मार्ग आंतरराष्ट्रीय दर्जानुसार तयार करण्याचे काम सुरू आहे. या मार्गातील मित्रमंडळ चौकातले डांबरीकरण दोन दिवसांपूर्वी पूर्ण झाले होते. मात्र, रस्त्याखालून जाणारी मुख्य जलवाहिनी अचानक फुटल्याने संपूर्ण काम पाण्यात वाहून गेले. जलवाहिनी फुटल्याने रस्त्यावर पाणीच पाणी झाले.
फुटलेल्या पाइपमधून हजारो लिटर पाणी रस्त्यावर साचले. पाण्याचा दाब आणि प्रवाहामुळे नवा रस्ता तुटून-फुटून खराब झाला. पाणी साचल्याने चौकात मोठी वाहतूक कोंडी झाली, तर रस्त्यावर घसरून काही दुचाकीस्वार पडण्याचे प्रकारही घडले. पाण्यामुळे रस्ता अक्षरश: खराब झाला. रस्ता लवकरात लवकर दुरुस्त करून द्यावा अशी मागणी नागरिकांनी केली.
जलवाहिनी फुटल्यानंतर, महापालिकेच्या पाणीपुरवठा विभागाने तातडीने दुरुस्तीचे काम सुरू केले असून या प्रक्रियेसाठी नव्याने तयार केलेला रस्ता पुन्हा खोदावा लागला आहे. या घटनेमुळे महापालिकेच्या कामाच्या गुणवत्तेबाबत प्रश्नचिन्ह उपस्थित झाले.
