पुणे (खडकवासला): खडकवासला धरण (Pune News) परिसरातून एक धक्कादायक घटना उघडकीस आली. गेल्या दोन दिवसांपासून बेपत्ता असलेल्या दीपक सपकाळ या तरुणाचा मृतदेह धरणाच्या बॅकवॉटरमध्ये तरंगताना आढळल्याने परिसरात मोठी खळबळ उडाली आहे.
मिळालेल्या माहितीनुसार, दीपक हा शनिवार संध्याकाळपासून अचानक बेपत्ता झाला होता. तो वेळेत घरी न परतल्याने काळजीत पडलेल्या कुटुंबाने नांदेड सिटी पोलीस ठाण्यात धाव घेऊन तो बेपत्ता असल्याची तक्रारही नोंदवली होती. मात्र, शोध सुरू असतानाच फिरायला गेलेल्या काही पर्यटकांना पाण्यात मृतदेह तरंगताना दिसला. मृतदेह दिसल्यानंतर पर्यटकांनी पोलिसांशी संपर्क केला. हवेली आपत्ती व्यवस्थापन रेस्क्यू टीमने घटनास्थळी पोहोचून मृतदेह बाहेर काढला, तेव्हा तो दीपकचा मृतदेह असल्याचे समोर आले.
दीपकने आत्महत्या केली कि त्याचा बुडून मृत्यू झाला याबाबत अधिक माहिती समोर आलेली नाही. मृत्यूचे नेमके कारण शवविच्छेदनाचा अहवाल आल्यानंतरच स्पष्ट होईल.
