मुंबई: दिवंगत माजी उपमुख्यमंत्री अजित पवार (Ajit Pawar) यांच्या अपघाती निधनाला महिना उलटला आहे. दरम्यान, या प्रकरणी अधिक तपास सुरु आहे. आता त्यांचे पुत्र जय पवार यांनी एक असा व्हिडिओ समोर आणला आहे, ज्याने खळबळ उडाली आहे. विमान कंपनीच्या मालकाचाच निष्काळजीपणा या व्हिडिओतून चव्हाट्यावर आला आहे.
महाराष्ट्राचे माजी उपमुख्यमंत्री अजित पवार यांच्या अपघाती मृत्यूच्या चौकशीवर आता प्रश्नचिन्ह उपस्थित झाले आहे. अधिकृत तपास अहवालात ‘झाडाला धडकून विमान कोसळले’ असे साधे कारण दिले जात असतानाच, जय पवार यांनी बाहेर आणलेल्या एका व्हिडिओने या संपूर्ण प्रकरणाचा रोखच बदलला आहे. समोर आलेल्या व्हिडीओनंतर अनेक प्रश्न उपस्थित केले जात आहेत.
पाहा व्हिडीओ:
View this post on Instagram
अजित पवार यांचा विमान अपघाताचा प्राथमिक चौकशी अहवाल अलीकडेच सादर करण्यात आला होता. मात्र, हा अहवाल ‘वरवरचा’ आणि ‘थातुरमातूर’ असल्याचे सांगत कुटुंबियांनी आणि समर्थकांनी तो फेटाळून लावला आहे. याच संशयाच्या वातावरणात जय पवार यांनी ‘व्हीएसआर’ (VSR) कंपनीचे मालक रोहित सिंह यांचा एक व्हिडिओ इन्स्टाग्रामवर शेअर केला आहे.
व्हिडिओमध्ये कंपनीचे मालक रोहित सिंह स्वतः मुख्य पायलटच्या सीटवर बसलेले असून, विमान हवेत असताना ते चक्क झोपा काढताना दिसत आहेत. दरम्यान, जय पवारांनी व्हिडीओ शेअर करत संताप व्यक्त केला आहे. जय पवारांनी डीजीसीएला (DGCA) साकडे घालत रोहित सिंह यांना तात्काळ अटक करण्याची आणि ‘व्हीएसआर’ची सर्व विमाने ‘ग्राउंड’ करण्याची मागणी केली आहे.
