Pune News: पुणे : दक्षिण पुण्यातील कोंढवा आणि येवलेवाडी परिसरातील नागरिकांसाठी दिलासादायक बातमी समोर आली आहे. शिवाजीनगर ते येवलेवाडी दरम्यान मेट्रो मार्गिका वाढवण्याचा प्रस्ताव सध्या पुढे आला आहे. सर्व मंजुरी आणि सर्वेक्षण वेळेत पूर्ण झाले तर 2030-31 पर्यंत ही मेट्रो (Pune Metro) सेवा सुरू करण्याचे उद्दिष्ट ठेवण्यात आले आहे. महा मेट्रो च्या अधिकाऱ्यांनी शिवाजीनगर ते येवलेवाडी असा सुमारे 20 किमी लांबीचा उन्नत मार्ग उभारण्याची तयारी सुरू असल्याची माहिती दिली आहे.
हा विस्तार हिंजवडी ते शिवाजीनगर या 23 किमी लांबीच्या मेट्रो मार्गिकेचा एक भाग असेल. हिंजवडी ते शिवाजीनगर हा प्रकल्प सार्वजनिक-खासगी भागीदारी तत्त्वावर राबवला जात आहे. मात्र कोंढवा ते येवलेवाडी हा टप्पा थेट महा मेट्रोकडून पूर्ण केला जाणार आहे. या मार्गावर एनआयबीएम ते उंड्री असा एक अतिरिक्त स्पर मार्ग देखील प्रस्तावित आहे.
प्रस्तावित मार्ग शिवाजीनगरपासून जिल्हाधिकारी कार्यालय, कॅम्प आणि पुलगेट मार्गे कोंढवा व येवलेवाडीपर्यंत नेण्यात येणार आहे. तसेच ज्योती चौक ते एनआयबीएम जंक्शन आणि पुढे बिशप विद्यालयाजवळ उंड्रीपर्यंत विस्ताराचा विचार आहे. सध्या या मार्गावर दर 1 किमी अंतरावर मेट्रो स्थानक उभारण्याचे नियोजन आहे.
दोन महिन्यांपूर्वी सल्लागारांची नियुक्ती करण्यात आली असून सविस्तर प्रकल्प अहवाल मे-जूनपर्यंत सादर होण्याची अपेक्षा आहे. राज्य सरकारची मंजुरी मिळाल्यानंतर हा प्रस्ताव केंद्र सरकारकडे पाठवला जाणार आहे. कोंढवा परिसरात मेट्रो नसल्याने नागरिकांना प्रवासात अडचणी येत आहेत. त्यामुळे हा प्रकल्प पूर्ण झाल्यास दक्षिण पुण्यातील वाहतूक व्यवस्था सुधारण्यास मोठी मदत होणार आहे.
