अमित मुंडीक
पुणे: पुणे (Pune News) शहरात कोथरुड पोलीस ठाण्यातील महिला पोलीस अंमलदाराचा विनयभंग केल्याप्रकरणी आणि पोलीस दलाचा अपमान केल्याप्रकरणी ‘महाराष्ट्र विकास मिडिया’ मधील दोघांवर गुन्हा दाखल करण्यात आला आहे. या घटनेमुळे शहरात खळबळ उडाली आहे. या प्रकरणी महिला पोलीस अमलदार धनश्री पांडुरंग कुलकर्णी (ब. नं. 1682) यांनी कोथरुड पोलीस ठाण्यात फिर्याद दिली आहे. फिर्यादीनुसार, 30 ऑक्टोबर 2025 रोजी दुपारी 3 वाजता महेश कामत नावाच्या व्यक्तीने पोलीस ठाण्याच्या अधिकृत क्रमांकावर फोन केला. या वेळी त्याने महिला कर्मचाऱ्यांशी अत्यंत अर्वाच्य भाषेत संवाद साधला. इतकेच नव्हे तर, महेश कामत याने वरिष्ठ पोलीस निरीक्षक आणि इतर पोलीस कर्मचाऱ्यांबद्दल अश्लील आणि बदनामीकारक वक्तव्ये करून पोलीस यंत्रणेचा अपमान केला.
रील बनवून बदनामी:
आरोपी महेश कामत याने संभाषणाचे काही भाग ऑडिओ क्लिपच्या स्वरूपात तयार केले. त्याने या क्लिप्स ‘रील’ म्हणून @maharashtravikasmedia या त्याच्या इन्स्टाग्राम आयडीवर प्रसारित केल्या. रील प्रसारित करण्यामागील त्याचा उद्देश जनतेमध्ये पोलिसांविरुद्ध अप्रिय भावना (विरोध) निर्माण करण्याचा होता, असे फिर्यादीत म्हटले आहे.
गंभीर कलमांन्वये गुन्हा दाखल:
या गंभीर प्रकरणी कोथरुड पोलीस ठाण्यात गु.र.नं. 304/2025 अन्वये विविध कलमांतर्गत गुन्हा दाखल करण्यात आला आहे. विशेष म्हणजे, आरोपी महेश कामत याचा यापूर्वीही बदलापूर पोलीस ठाण्यात खंडणी आणि धमकी देण्यासारख्या गुन्ह्यांमध्ये सहभाग असल्याचे पोलिसांच्या प्राथमिक चौकशीत समोर आले आहे.
