पुणे: पुणे महानगर परिवहन महामंडळाने (पीएमपीएमएल) बसमध्ये (Pune News) विनापरवानगी चित्रीकरण करून सोशल मीडियावर रील प्रसारित केल्याप्रकरणी पुण्यातील एका प्रसिद्ध रीलस्टार अथर्व सुदामे (Atharwa Sudame) याला नोटीस बजावली आहे.अथर्व सुदामे हा सोशल मीडियावर मोठ्या प्रमाणावर लोकप्रिय असून, त्याच्या इन्स्टाग्रामवरील रील्सना लाखो लोक पाहतात. मात्र, पीएमपीएमएलच्या बसमध्ये चित्रीकरण करून ते सोशल मीडियावर प्रसारित केल्याने हा प्रकार वादात सापडला आहे. (Breaking News)
पीएमपीएमएलकडून जारी करण्यात आलेल्या नोटीस नुसार, संबंधित रीलमध्ये महामंडळाच्या मालकीच्या बसमध्ये चित्रीकरण करण्यात आले होते. या दरम्यान महामंडळाचा गणवेश, ई-तिकीट मशीन तसेच बॅच-बिल्ला यांचा वापर कोणतीही अधिकृत परवानगी न घेता करण्यात आल्याचे निदर्शनास आले आहे. हे चित्रीकरण थेट इन्स्टाग्रामवर अपलोड करून प्रसारित करण्यात आले होते.
महामंडळाने दिलेल्या माहितीनुसार, या रीलमध्ये महिला प्रवाशांचे अवमान करणारे आणि अपमानास्पद चित्रण दिसून येत आहे. त्यामुळे महिला प्रवाशांच्या सन्मान, प्रतिष्ठा आणि मानसिक सुरक्षिततेवर परिणाम होत असल्याचा ठपका पीएमपीएमएलने ठेवला आहे. तसेच अशा प्रकारच्या कृतीमुळे सार्वजनिक बससेवेवरील विश्वासाला धक्का बसत असून, महामंडळाची प्रतिमा जनमानसात मलिन होत असल्याचेही नोटिशीत नमूद करण्यात आले आहे.
या पार्श्वभूमीवर पीएमपीएमएलने संबंधित रील तात्काळ सोशल मीडियावरून हटवण्याचे आदेश दिले आहेत. तसेच भविष्यात महामंडळाच्या सक्षम प्राधिकरणाची लेखी परवानगी घेतल्याशिवाय कोणतेही फोटो, व्हिडिओ किंवा रील प्रसारित करू नयेत, असे स्पष्ट करण्यात आले आहे. नोटीस प्राप्त झाल्यापासून सात दिवसांच्या आत लेखी खुलासा सादर करण्याचे निर्देशही देण्यात आले असून, मुदतीत खुलासा न दिल्यास कायदेशीर कारवाई करण्यात येईल, असा इशारा प्रशासनाने दिला आहे.
