पुणे: येरवडा पोलीस (Pune News) ठाण्याच्या कोठडीतून खिडकी काचा फोडून पळ काढणाऱ्या एका अट्टल आरोपीला पोलिसांनी एखाद्या चित्रपटाचा सीन शोभावा अशा पद्धतीने अवघ्या तीन तासांत पुन्हा जेरबंद केले आहे. ‘पोक्सो’ अंतर्गत पोलीस कोठडीत असलेल्या शैलेश राजू मोहिते (19, रा. कामराजनगर) असे या आरोपीचे नाव आहे.
रविवारी सायंकाळी आरोपी शैलेशने अतिशय थंड डोक्याने पलायन करण्याचा प्रयत्न केला. “अंथरण्यासाठी चादर हवी आहे,” असे सांगून त्याने कर्तव्यावर असलेल्या पोलिसांचे लक्ष विचलित केले. संधी मिळताच त्याने कोठडीतील स्वच्छतागृहाच्या खिडकीच्या काचा फोडल्या आणि तिथून बाहेर उडी मारून पसार झाला.
कोठडीत आरोपी नसल्याचे लक्षात येताच जेलचा संपूर्ण परिसर सील केला. आरोपी आपल्या घराच्या दिशेने किंवा शहराबाहेर पळण्याच्या तयारीत असतानाच, पोलिसांनी तांत्रिक तपासाच्या आधारे त्याचा माग काढला. सर्व बाजूंनी रस्ता अडवून पोलिसांनी अवघ्या180 मिनिटांत त्याला पुन्हा बेड्या ठोकल्या.
