Pune News: पुणे : शहरात मागील काही दिवसांपूर्वी गुन्हेगारी घटनांमुळे मोठी खळबळ उडाली होती. पुणे पोलिसांनी कडक कारवाई केल्यानंतर गुन्हेगारी टोळी आता शांत झाली आहे. आंदेकर टोळी, गजा मारणे टोळी आणि घायवळ टोळीविरोधात करण्यात आलेल्या कारवाईनंतर या टोळ्यांशी संबंधित काही व्यक्ती आता राजकारणाकडे वळत असल्याचे चित्र दिसू लागले आहे. या पार्श्वभूमीवर माजी नगरसेविका आणि गजा मारणे यांची पत्नी जयश्री मारणे यांनी उपमुख्यमंत्री अजित पवार यांची भेट घेतल्याने राजकीय चर्चांना वेग आला आहे.
हेही वाचा- पुण्यात आज जमावबंदी लागू! पुणेकरांनो ‘हे’ नियम वाचा, अन्यथा थेट होणार कारवाई
जयश्री मारणे या बारामती येथील शासकीय वसतिगृहात अजित पवार यांच्या भेटीसाठी पोहोचल्या होत्या. त्या यापूर्वी पुणे महानगरपालिकेच्या नगरसेविका राहिल्या आहेत. 2012 साली त्यांनी कोथरूड मतदारसंघातून महापालिकेची निवडणूक लढवली होती. त्या वेळी मनसेच्या तिकिटावर त्या निवडून आल्या होत्या. त्यानंतर राजकारणात सक्रिय राहिलेल्या जयश्री मारणे यांनी 2022 मध्ये राष्ट्रवादी काँग्रेस पक्षात प्रवेश केला होता.
आता येणाऱ्या पुणे महानगरपालिका निवडणुकीत त्या पुन्हा एकदा उमेदवारी करण्यास इच्छुक असल्याची माहिती समोर येत आहे. याच पार्श्वभूमीवर त्यांनी अजित पवार यांची भेट घेतल्याचे बोलले जात आहे. या भेटीमागे नेमका उद्देश काय होता, याबाबत अधिकृत माहिती समोर आलेली नसली तरी राजकीय वर्तुळात तर्कवितर्क लावले जात आहेत.
दरम्यान, पुण्यातील इतर गुन्हेगारी टोळ्यांशी संबंधित व्यक्तीही निवडणूक रिंगणात उतरण्याच्या तयारीत असल्याचे चित्र आहे. घायवळ टोळीशी संबंधित काही नावे तसेच आंदेकर टोळीतील सदस्यांनीही निवडणूक लढवण्याची तयारी दर्शवली होती. त्यामुळे शहरातील राजकारणात गुन्हेगारी पार्श्वभूमी असलेल्या व्यक्तींच्या सहभागावर पुन्हा एकदा चर्चा सुरू झाली आहे.
जयश्री मारणे यांना राष्ट्रवादी काँग्रेसकडून तिकीट दिले जाणार का, आणि आगामी निवडणुकीत त्यांची भूमिका काय असणार, याकडे सध्या सर्वांचे लक्ष लागले आहे.
