Pune Leopard : पुणे : पिंपरी-चिंचवड (Pimpri Chinchwad) महापालिका हद्दीतील निगडी परिसरात बिबट्या आढळल्याची घटना समोर आली आहे. निगडीतील दुर्गा टेकडी परिसर तसेच एमआयडीसीच्या (MIDC) जलशुद्धीकरण प्रकल्पाच्या जागेत 9 जानेवारी रोजी बिबट्या (Leopard) दिसल्याची माहिती मिळाली आहे. या घटनेमुळे परिसरात काही काळ भीतीचे वातावरण निर्माण झाले होते.
घटनेची माहिती मिळताच महापालिकेच्या उद्यान विभागासह वनविभागाच्या कर्मचाऱ्यांनी तत्काळ संबंधित परिसराची पाहणी केली. नागरिकांच्या सुरक्षिततेच्या दृष्टीने खबरदारी म्हणून दुर्गा टेकडी परिसरात नागरिकांचा प्रवेश तात्पुरता बंद करण्यात आला आहे. तसेच या ठिकाणी वनविभागाचे कर्मचारी तैनात करण्यात आले असून परिसरावर लक्ष ठेवले जात आहे.
निगडीतील दुर्गा टेकडी हा परिसर निसर्गसंपन्न आहे. येथे दररोज सकाळी आणि संध्याकाळी अनेक नागरिक चालण्यासाठी, व्यायामासाठी आणि फेरफटका मारण्यासाठी येत असतात. टेकडीच्या आसपास जलशुद्धीकरण केंद्र तसेच अॅम्युनिशन फॅक्टरीचा संरक्षित भाग आहे. हा संपूर्ण परिसर घनदाट झाडे, झुडपे आणि जंगलाने वेढलेला आहे. त्यामुळे येथे विविध प्रकारचे प्राणी आढळतात.
या परिसरात भटक्या कुत्र्यांची संख्या मोठ्या प्रमाणात आहे. अन्नाच्या शोधात बिबट्या या भागात येण्याची शक्यता नाकारता येत नाही, असे वनविभागाकडून सांगण्यात आले आहे. त्यामुळे नागरिकांच्या सुरक्षेसाठी खबरदारी म्हणून दुर्गा टेकडी तात्पुरती बंद ठेवण्याचा निर्णय घेण्यात आला आहे.
महापालिकेचे मुख्य उद्यान अधीक्षक महेश गारगोटे यांनी सांगितले की, महापालिका आणि वनविभाग यांचा सतत संपर्क सुरू आहे. परिस्थितीवर लक्ष ठेवले जात असून आवश्यक ती सर्व खबरदारी घेतली जात आहे. नागरिकांनी अफवांवर विश्वास न ठेवता प्रशासनाच्या सूचनांचे पालन करावे, असे आवाहन त्यांनी केले आहे. तसेच पुढील आदेश येईपर्यंत दुर्गा टेकडी परिसरात जाणे टाळावे, असेही प्रशासनाकडून स्पष्ट करण्यात आले आहे.
