पुणे: पुण्यात तरुणांना नशेसाठी मेफेन्टरमाइन इंजेक्शनची बेकायदेशीर विक्री करणाऱ्या सराईत गुन्हेगाराला गुन्हे शाखेच्या खंडणी विरोधी पथकाने अटक केली आहे. आरोपीच्या ताब्यातून मेफेन्टरमाइनच्या 83 बाटल्या जप्त करण्यात आल्या असून या कारवाईमुळे परिसरात खळबळ उडाली आहे.
अटक करण्यात आलेल्या आरोपीचे नाव अभिषेक खंडू भडंगे (वय 25, रा. हिंगणे मळा, हडपसर) असे आहे. तो रेकॉर्डवरील गुन्हेगार असून त्याच्याविरोधात विविध पोलीस ठाण्यांत गंभीर गुन्हे दाखल असल्याची माहिती समोर आली आहे. यापूर्वी त्याच्यावर स्थानबद्धतेची कारवाईही करण्यात आली होती आणि नुकताच तो कारागृहातून बाहेर आला होता.
पोलिसांनी दिलेल्या माहितीनुसार, आरोपी भडंगे प्रतिबंधित ॲपच्या माध्यमातून मेफेन्टरमाइन इंजेक्शनच्या बाटल्या मागवत होता. त्यानंतर व्हॉट्सॲप आणि इंस्टाग्रामसारख्या सोशल मीडियाद्वारे तो हे इंजेक्शन तरुणांना विकत असल्याची माहिती पोलिसांना मिळाली. त्यानुसार सापळा रचून त्याला ताब्यात घेण्यात आले.
प्राथमिक तपासात आरोपीकडे हे औषध विक्री करण्याचा कोणताही अधिकृत परवाना नसल्याचे उघड झाले आहे. तसेच औषध विक्री किंवा वापरासंदर्भातील कोणतेही प्रशिक्षण त्याने घेतले नव्हते. तरीही तो बेकायदेशीरपणे इंजेक्शनची विक्री करत होता.
मेफेन्टरमाइन सल्फेट हे एक शक्तिशाली औषध असून सामान्यतः रुग्णालयांमध्ये रक्तदाब अचानक कमी झाल्यास उपचारासाठी वापरले जाते. चुकीच्या पद्धतीने किंवा डॉक्टरांच्या सल्ल्याशिवाय वापरल्यास गंभीर आरोग्य समस्या निर्माण होऊ शकतात.
या प्रकरणी काळेपडळ पोलीस ठाण्यात गुन्हा दाखल करण्यात आला असून पुढील तपास सुरू आहे. ही कारवाई वरिष्ठ पोलीस निरीक्षक राम राजमाने यांच्या मार्गदर्शनाखाली गुन्हे शाखेच्या पथकाने केली.
