पुणे: मुंबई महानगरपालिका (Pune Election) निवडणुकीच्या प्रचाराचा वेग वाढत असताना( Pune Mahapalika Election) बड्या राजकीय नेत्यांच्या (Devendra Fadanavis) मुलाखतींमुळे निवडणुकीला नवा रंग चढताना दिसत आहे. अनेक नेत्यांच्या मुलाखती सध्या चर्चेत असून काही दिवसांपूर्वी ठाणे महापालिकेच्या (Girija Oak) पार्श्वभूमीवर वीण दोघातली तुटेना या लोकप्रिय मालिकेतील अभिनेत्री तेजश्री प्रधानने आपलं ठाणे आपले देवाभाऊ या कार्यक्रमात मुख्यमंत्री देवेंद्र फडणवीस यांची मुलाखत घेतली होती. या मुलाखतीत तेजश्री प्रधानने मुंबईकर म्हणून काही प्रश्न आणि समस्या मांडल्याचेही पाहायला मिळाले होते.
आता देशभरातील तरुणाईची क्रश म्हणून ओळखली जाणारी प्रसिद्ध अभिनेत्री गिरिजा ओक मुख्यमंत्री देवेंद्र फडणवीस यांची मुलाखत घेणार आहे. पुणे महानगरपालिका निवडणुकीच्या पार्श्वभूमीवर भारतीय जनता पक्षाने पुणे शहरात संवाद पुणेकरांशी नावाचा विशेष संवादात्मक कार्यक्रम आयोजित केला आहे. या कार्यक्रमात मुख्यमंत्री देवेंद्र फडणवीस थेट नागरिकांशी संवाद साधणार असून त्यांची मुलाखत अभिनेत्री गिरिजा ओक घेणार आहे.
हा कार्यक्रम रविवारी 11 जानेवारी रोजी सायंकाळी 7 वाजता एरंडवणे येथील शुभारंभ लॉन्स येथे होणार आहे. या कार्यक्रमाला विविध क्षेत्रातील मान्यवर, नागरिक आणि प्रतिनिधी मोठ्या संख्येने उपस्थित राहण्याची शक्यता आहे.
प्रचारात लोकप्रिय चेहऱ्यांचा वापर करणे हे राजकारणातील जुनेच गणित आहे. एखाद्या लोकप्रिय अभिनेत्रीचा चेहरा समोर आला की लोकांचे लक्ष आपोआप वेधले जाते. हेच गणित भारतीय जनता पक्षाने अचूक हेरले असल्याची चर्चा सध्या रंगली आहे. गेल्या काही दिवसांत अनेक मराठी कलाकारांनी भाजपला जाहीर समर्थन दिल्याचे दिसून आले आहे. अभिनेता आणि निर्माते महेश कोठारे तसेच अभिनेत्री निवेदिता सराफ यांनीही भाजपविषयी आपली भूमिका उघडपणे मांडली होती.
महापालिका निवडणुकीच्या पार्श्वभूमीवर भाजपचा हा सेलिब्रिटी पॅटर्न आता मुख्यमंत्री देवेंद्र फडणवीस यांच्या मुलाखतींमधूनही दिसून येत आहे. ठाण्यात अभिनेत्री तेजश्री प्रधान आणि पुण्यात अभिनेत्री गिरिजा ओक हे चेहरे मुलाखतकार म्हणून दिसणार असल्याने या कार्यक्रमांची चांगलीच चर्चा सुरू झाली आहे.
