Pune Crime : लोणी काळभोर, ता. 18 : पूर्वी केलेली तक्रार मागे घेण्यास नकार दिल्याच्या रागातून एका टेलरवर भरदिवसा लाकडी दांडक्याने बेदम मारहाण केल्याची घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील खोकलाई मंदिराजवळ शुक्रवारी (ता. 17) दुपारी तीन वाजण्याच्या सुमारास घडली आहे. लोणी काळभोर पोलीस ठाण्यात दोन भावांच्या विरोधात गुन्हा दाखल करण्यात आला आहे.
शरद अच्युत कदम (वय 36) आणि राहुल अच्युत कदम (वय 33, दोघेही रा. बाजारमळा, लोणी काळभोर) असे गुन्हा दाखल करण्यात आलेल्या दोघांची नावे आहेत. याप्रकरणी विलास रोहिदास जाधव (वय 44) यांनी लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी विलास जाधव हे टेलरिंग व्यवसाय करून कुटुंबाचा उदरनिर्वाह करतात. त्यांच्या कुटुंबात पत्नी, दोन मुली आणि एक मुलगा असा परिवार आहे.
जाधव हे नेहमीप्रमाणे सकाळी आपल्या दुकानात काम करत होते. दुपारी सुमारे 3 वाजण्याच्या सुमारास ते जेवणासाठी घरी गेले. जेवण आटोपल्यानंतर त्यांच्या मुलाची चप्पल तुटल्याने ती शिवून घेण्यासाठी ते दत्त मंदिर परिसराकडे जात होते. याच वेळी खोकलाई मंदिराजवळ अचानक चारचाकी गाडीतून आलेल्या शरद कदम आणि राहुल कदम यांनी जाधव यांचा रस्ता अडवला. गाडीची काच खाली करून त्यांनी जाधव यांना दमदाटी करत, “तू आमच्याविरोधात दिलेली तक्रार लगेच मागे घे, नाहीतर तुला आणि तुझ्या मुलांना लोणी काळभोरमध्ये फिरू देणार नाही,” अशी उघड धमकी दिली.
जाधव यांनी शांतपणे “मी कायदेशीर तक्रार केली आहे, पुढे जे होईल ते कायद्यानुसार होईल,” असे सांगताच आरोपी संतापले. त्यानंतर दोघेही गाडीतून खाली उतरले आणि त्यांनी जाधव यांना गच्च पकडून लाकडी दांडक्याने बेदम मारहाण करण्यास सुरुवात केली. दंड, पाठ आणि हातावर वारंवार प्रहार करत त्यांना गंभीर दुखापत करण्यात आली. “तुला खूप मस्ती आली आहे,” असे म्हणत आरोपींनी धमकावत हल्ला सुरूच ठेवला.
या प्रकारामुळे परिसरात काही काळ भीतीचे वातावरण निर्माण झाले. दरम्यान, जाधव यांचा पुतण्या सागर राजाभाऊ जाधव हा घटनास्थळी पोहोचला आणि त्याने हस्तक्षेप करत जाधव यांची सुटका केली. त्यानंतर आरोपी दोघेही तेथून पसार झाले. या घटनेनंतर जखमी अवस्थेत जाधव यांनी तत्काळ लोणी काळभोर पोलीस ठाण्यात धाव घेतली. पोलिसांनी त्यांना वैद्यकीय तपासणीसाठी पुण्यातील ससून रुग्णालयात पाठवले. तेथे उपचार घेतल्यानंतर त्यांनी अधिकृत तक्रार दाखल केली. या प्रकरणी शरद कदम आणि राहुल कदम या दोघांविरोधात भारतीय न्याय संहिता (BNS) 2023 अंतर्गत कलम 118(1), 351(2), 352 नुसार गुन्हा दाखल करण्यात आला आहे.
