Pune Crime : उरुळी कांचन, ता. 02 : सोरतापवाडी परिसरात घरासमोर उभ्या असलेल्या दुचाकींची चोरी करणाऱ्या चोरट्यांनी अक्षरशः धुमाकूळ घातला असून अवघ्या चार दिवसांत तीन मोटारसायकली लंपास केल्याच्या घटना समोर आल्या आहेत. या प्रकारामुळे नागरिकांमध्ये भीतीचे वातावरण निर्माण झाले आहे.
सोरतापवाडी (ता. हवेली) ग्रामपंचायत हद्दीतील लोणकरमळा परिसरात गुरुवारी (ता. 26) मध्यरात्री घरासमोर उभ्या असलेल्या एकाच मालकाच्या 55 हजार रुपये किमतीच्या दोन मोटारसायकली अज्ञात चोरट्यांनी चोरून नेल्या. यापूर्वी सोमवारी (ता. 23) सोरतापवाडी हद्दीतील चिंतामणी पार्क परिसरातून 70 हजार रुपये किमतीची दुचाकी अज्ञात चोरट्यांनी पळवून नेली होती.
याप्रकरणी विश्वनाथ रामचंद्र आढाळगे (वय 50, व्यवसाय – मजुरी, रा. लोणकरमळा, सोरतापवाडी, ता. हवेली) यांच्या दोन मोटारसायकली चोरीस गेल्या आहेत. तसेच विठ्ठल अभिमान कांबळे (रा. चिंतामणी पार्क, सोरतापवाडी, ता. हवेली) यांची दुचाकी चोरीस गेल्याप्रकरणी उरुळी कांचन पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
मिळालेल्या माहितीनुसार, फिर्यादी आढाळगे यांनी दोन मोटारसायकली खरेदी केल्या होत्या. त्यापैकी एक मोटारसायकल ते स्वतः वापरत होते, तर दुसरी त्यांचा मुलगा वापरत होता. बुधवारी (ता. 25) रात्री सुमारे 9 वाजता दोन्ही मोटारसायकली घरासमोर पार्क करून ठेवण्यात आल्या होत्या. त्या वेळी गाड्यांना लॉक करण्यात आले नव्हते.
रात्री कुटुंबीय जेवण करून झोपले. मात्र मध्यरात्री साडेबारा वाजण्याच्या सुमारास मुलगा आकाश याने वडिलांना उठवून दोन्ही मोटारसायकली गायब झाल्याचे सांगितले. त्यानंतर कुटुंबीयांनी परिसरात शोध घेतला; मात्र काहीच मागमूस लागला नाही.
तक्रारीनुसार, अज्ञात चोरट्यांनी 20 हजार रुपये किमतीची हिरो कंपनीची HF Deluxe (क्रमांक MH 12 MU 6341) आणि 35 हजार रुपये किमतीची हिरो कंपनीची Passion Pro (क्रमांक MH 12 RU 1154) अशा एकूण 55 हजार रुपये किमतीच्या दोन मोटारसायकली चोरून नेल्या आहेत.
दरम्यान, विठ्ठल कांबळे यांनी MH 12 WS 8817 क्रमांकाची दुचाकी घरासमोर हँडल लॉक करून पार्क केली होती. सकाळी कामावर जाण्यासाठी बाहेर आले असता दुचाकी जागेवर दिसली नाही. आजूबाजूला शोध घेतला; मात्र ती मिळून आली नाही. याप्रकरणी अज्ञात चोरट्यांविरोधात उरुळी कांचन पोलीस ठाण्यात गुन्हा दाखल करण्यात आला असून पुढील तपास सुरू आहे.
