Pune Crime: पुणे (विमाननगर): पुण्यातील हायप्रोफाईल विमाननगर परिसरात एक धक्कादायक चोरीची घटना समोर आली आहे. तंत्रज्ञानाचा वापर करून घराचे संरक्षण करण्यासाठी बसवलेले ‘डिजिटल लॉक’ सुरक्षित असल्याचे मानले जाते, मात्र एका दूध पुरवठादाराने या लॉकचा पासवर्ड चोरून घरातून 1 लाख 32 हजार रुपयांची रोकड लंपास केली. ही संपूर्ण घटना सीसीटीव्ही कॅमेऱ्यात कैद झाली असून, पोलिसांनी आरोपीला बेड्या ठोकल्या आहेत.
पोलिसांनी दिलेल्या माहितीनुसार, व्यंकटेश वसंत कारंडे (वय 34, रा. वडगावशेरी) असे आरोपीचे नाव आहे. तो गेल्या दोन वर्षांपासून विमाननगर परिसरातील एका निवासी सोसायटीत दूध पुरवठा करत होता. न्यू एअरपोर्ट रोडवरील एमिनेन्स बाय नायकनवरे या निवासी संकुलातील पाचव्या मजल्यावरील फ्लॅटमध्ये 17 जानेवारी रोजी ही चोरी घडली.
तक्रारदार सूर्यनारायण राजारतीलम (वय 48) हे विमाननगर परिसरात रामेश्वरम नावाचे कॅफे चालवतात. ते आपल्या कुटुंबासह सदर फ्लॅटमध्ये भाड्याने राहत होते. रोजच्या दिनक्रमानुसार राजारतीलम सकाळी 5 वाजता कॅफेवर गेले होते. सकाळी सुमारे 7 वाजता घरी परतल्यानंतर त्यांनी स्वयंपाकघरातील कपाट तपासले असता त्यामधील 1,32,550 रुपये गायब असल्याचे लक्षात आले. त्या वेळी घरातील इतर सदस्य झोपेत होते आणि चोरी झाल्याची कोणालाही कल्पना नव्हती.
फ्लॅटला पासवर्डवर चालणारे डिजिटल डोअर लॉक बसवण्यात आले होते. आरोपीने अनेक वेळा पासवर्डचा अंदाज घेऊन दरवाजा उघडल्याचे तपासात समोर आले आहे. सीसीटीव्ही फुटेजच्या आधारे पोलिसांनी आरोपीला ओळखून अटक केली असून, चोरीस गेलेली संपूर्ण रक्कम जप्त करण्यात आली आहे.
या प्रकरणी विमाननगर पोलिस ठाण्यात भारतीय न्याय संहिता अंतर्गत घरफोडी आणि चोरीचे गुन्हे दाखल करण्यात आले असून, पुढील तपास सुरू आहे. डिजिटल लॉक असले तरीही सुरक्षिततेबाबत नागरिकांनी अधिक काळजी घ्यावी, असे आवाहन पोलिसांकडून करण्यात आले आहे.
