पुणे: पुणे शहरात समलिंगी डेटिंग ॲपचा (Pune Crime) वापर करून तरुणांना लुबाडणारी टोळी सक्रिय असल्याचे उघडकीस आले असून, कोंढवा परिसरात घडलेल्या एका थरारक घटनेमुळे खळबळ उडाली आहे. हुकअपच्या बहाण्याने एका 27 वर्षीय तरुणाला एकांत ठिकाणी बोलावून, शस्त्राचा धाक दाखवत त्याच्याकडील रोख रक्कम, दागिने आणि मोबाईल लुटल्याची घटना समोर आली आहे. (Latest Marathi News)
वाघोली परिसरात राहणारा हा तरुण एका समलिंगी डेटिंग ॲपवर सक्रिय होता. याच ॲपवर ‘Im Top’ नावाच्या आयडीवरून त्याला मेसेज आला. त्यानंतर दिलेल्या मोबाईल नंबरवर संपर्क साधल्यावर आरोपीने आपले नाव ‘राहील’ असल्याचे सांगत संवाद वाढवला. काही दिवस गप्पा झाल्यानंतर आरोपीने तरुणाला हुकअपसाठी कोंढव्यातील शीतल पेट्रोल पंप परिसरात येण्यास सांगितले.
ठरल्याप्रमाणे तरुण कोंढव्यात पोहोचला. मात्र तिथे राहील एकटाच नसून त्याच्यासोबत आणखी तीन जण होते. चौघांनी मिळून तरुणाला गोड बोलून पानसरे नगरजवळील एका मैदानात नेले. निर्जन ठिकाणी पोहोचताच टोळीने आपला खरा चेहरा दाखवला. तरुणाला मारहाण करत शस्त्राचा धाक दाखवण्यात आला आणि त्याच्याकडील महागडा मोबाईल, सोन्या-चांदीचे दागिने, रोख रक्कम तसेच एटीएममधून पैसे काढून एकूण 80,300 रुपये जबरदस्तीने लुटण्यात आले. त्यानंतर आरोपी घटनास्थळावरून पसार झाले.
घटनेनंतर पीडित तरुणाने कोंढवा पोलीस ठाण्यात तक्रार दाखल केली आहे. पोलिसांनी अज्ञात आरोपींविरुद्ध गुन्हा दाखल करून डेटिंग ॲपवरील प्रोफाइल, मोबाईल नंबर आणि परिसरातील सीसीटीव्ही फुटेजच्या आधारे तपास सुरू केला आहे.
