पुणे : शहरात (Pune Crime) नवरात्रोत्सवाची धामधूम सुरू असतानाच चोरट्यांनी थैमान घालत कात्रजमधील (Katraj News) सुखसागरनगर भागातील एका बंगल्यात देवीच्या मूर्तीवरील 10 लाख रुपये किंमतीचा सोन्याचा राणीहार लांबवला. या घटनेमुळे परिसरात खळबळ उडाली असून भक्तांमध्येही चिंता पसरली आहे. या प्रकरणी भारती विद्यापीठ पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, तक्रारदार हे सुखसागरनगरमधील एका बंगल्यात कुटुंबासह राहतात. नवरात्रोत्सवानिमित्त घरातील देवीच्या मूर्तीस सोन्याचा राणीहार परिधान करण्यात आला होता. 24 सप्टेंबर रोजी दुपारी अज्ञात चोरटे घरात शिरले आणि देवघरात ठेवलेल्या देवीच्या मूर्तीवरील सुवर्णहार चोरी करून पसार झाले.
दरम्यान, तक्रारदार पूजा करण्यासाठी देवघरात गेले असता राणीहार गायब असल्याचे त्यांच्या लक्षात आले. त्यांनी तत्काळ भारती विद्यापीठ पोलीस ठाण्यात धाव घेत तक्रार नोंदवली. पोलीस उपनिरीक्षक निलेश मोकाशी या प्रकरणाचा तपास करत आहेत.
घटनेची माहिती मिळताच पोलिसांनी घटनास्थळी धाव घेऊन पंचनामा केला. भरदिवसा घडलेल्या या चोरीप्रकरणी परिसरातील नागरिकांमध्ये भीतीचे वातावरण निर्माण झाले आहे. बंगल्याच्या परिसरात बसविण्यात आलेले सीसीटीव्ही फुटेज पोलिसांकडून तपासण्यात येत असून चोरट्यांची ओळख पटवण्याचे प्रयत्न सुरू आहेत.
नवरात्रोत्सव काळात सोन्याचे दागिने मूर्तींना परिधान करण्याची प्रथा असते. मात्र, या दागिन्यांवर चोरट्यांचे डोळे असतात हे पुन्हा एकदा अधोरेखित झाले आहे. भरदिवसा घरात शिरून चोरट्यांनी लाखोंचा हार लंपास केल्याने नागरिकांनी सुरक्षेचा प्रश्न उपस्थित केला आहे. विशेषतः नवरात्र, गणेशोत्सव यांसारख्या धार्मिक सणांदरम्यान सोन्याचे दागिने वापरताना अतिरिक्त काळजी घेणे आवश्यक असल्याचे पोलीस सुचवत आहेत.
या चोरीमुळे परिसरात असुरक्षिततेची भावना वाढली असून पोलिसांनी लवकरात लवकर चोरट्यांना पकडून सोन्याचा राणीहार परत मिळवावा, अशी मागणी नागरिकांकडून होत आहे. सध्या पोलिसांनी गुन्हा दाखल करून तपासाचा वेग वाढवला असून लवकरच चोरटे पोलिसांच्या ताब्यात येतील, असा विश्वास व्यक्त केला जात आहे.
