पुणे : कोंढवा परिसरात (Pune Crime) घडलेल्या एका धक्कादायक घटनेने परिसरात खळबळ माजली आहे. आर्थिक वादातून थेट 14 वर्षीय शाळकरी मुलावर तीक्ष्ण (Pune News) शस्त्राने वार करण्यात आला. या खुनाच्या प्रयत्नप्रकरणी पोलिसांनी दाम्पत्याला अटक केली आहे. शाहरुख मोहम्मदीन फिरोज खान आणि मरियम शाहरुख खान (रा. हुमेरा मंजिल, शेर खान चाळीसमोर, कोंढवा) अशी अटक करण्यात आलेल्या आरोपींची नावे आहेत.
या घटनेबाबत पोलिसांनी दिलेल्या माहितीनुसार, अल्पवयीन मुलाच्या वडिलांचा आरोपी शाहरुख याच्याशी काही आर्थिक व्यवहारावरून वाद सुरू होता. सोमवारी (22 सप्टेंबर) रात्री सुमारे 9.45 वाजण्याच्या सुमारास शाहरुख आणि त्याची पत्नी मरियम हे थेट पीडित मुलाच्या घरी गेले. तेथे त्यांनी सुरुवातीला शिवीगाळ केली. एवढ्यावरच न थांबता आरोपींनी अल्पवयीन मुलाच्या आईला देखील मारहाण केली.
या वेळी मुलाने परिस्थितीत मध्यस्थी करण्याचा प्रयत्न केला. मात्र संतापलेल्या आरोपींनी त्याला देखील शिवीगाळ करत छातीवर तीक्ष्ण शस्त्राने वार केला. या हल्ल्यात तो गंभीर जखमी झाला असून त्याला तातडीने उपचारासाठी रुग्णालयात हलविण्यात आले आहे. सध्या त्याच्यावर वैद्यकीय उपचार सुरू आहेत.
घटनेची माहिती मिळताच सहायक पोलीस आयुक्त धन्यकुमार गोडसे, वरिष्ठ पोलीस निरीक्षक विनय पाटणकर यांनी घटनास्थळी धाव घेतली. तातडीने पोलिसांनी कारवाई करत शाहरुख आणि त्याची पत्नी मरियम यांना अटक केली. या प्रकरणाचा तपास सहायक पोलीस निरीक्षक जाधव यांच्या मार्गदर्शनाखाली सुरू आहे.
या प्रकारामुळे कोंढवा परिसरात भीतीचे व अविश्वासाचे वातावरण निर्माण झाले आहे. आर्थिक वाद इतक्या टोकाला जाऊन अल्पवयीन मुलाचे प्राण धोक्यात घालण्यात आल्याने संताप व्यक्त होत आहे. पोलिसांनी या गुन्ह्याची चौकशी वेगाने करून आरोपींवर कठोर कारवाई करावी, अशी मागणी स्थानिक रहिवाशांकडून होत आहे.
