नाशिक: नाशिक येथील टाटा कन्सल्टन्सी सर्व्हिसेस (TCS) कंपनीत घडलेल्या एका गंभीर प्रकरणाने संपूर्ण महाराष्ट्रात खळबळ उडवून दिली आहे. महिला कर्मचाऱ्यांचे शोषण आणि त्यांना सक्तीने धर्मांतरित करण्याचा प्रयत्न केल्याच्या या प्रकरणाचा तपास आता अंतिम टप्प्यात आला असून, पोलिसांनी या प्रकरणात 2,000 पानांचे सविस्तर दोषारोपपत्र दाखल केले आहे. यात धक्कादायक खुलासे समोर आले आहेत.
पीडित तरुणीच्या तक्रारीनुसार, दानिश नावाच्या व्यक्तीने तिला लग्नाचे आमिष दाखवून प्रेमाच्या जाळ्यात ओढले होते. त्यानंतर त्याने तिच्यावर दबाव टाकण्यास सुरुवात केली. दानिशने तिला हिंदू देवदेवतांची गाणी ऐकण्यापासून आणि मंदिरात जाण्यापासून रोखले होते. मानसिक तणाव कमी करण्याच्या नावाखाली तिला तारिक जमील, झाकीर नाईक आणि डॉ. इसरार अहमद यांचे व्हिडिओ पाहण्यास सक्ती केली जात होती.
दानिशला या प्रकरणी तौसिफ आणि निदा खान हे दोघेही मदत करत होते. दरम्यान हिंदू तरुणीला धर्मांतरणासाठी प्रवृत्त करत होते. इस्लाम स्वीकारल्यास सर्व मानसिक दुःख दूर होईल, अशी चुकीची धारणा तिच्या मनात निर्माण केली गेली होती.
दानिशने तरुणीची आर्थिक पिळवणूकही केली आहे. त्याने तिच्या खात्यातून पैसे काढून अनेक महागड्या वस्तू खरेदी केल्या. या गंभीर प्रकरणात पोलिसांनी आतापर्यंत 8 संशयितांविरुद्ध 9 गुन्हे दाखल केले असून, सखोल चौकशी सुरू आहे.
