पुणे: जीएसटीमध्ये झालेल्या सुधारणांमुळे (GST Reforms) अनेक दैनंदिन वापरातील वस्तूंच्या किमती कमी (GST Rates) झाल्या आहेत. परंतु, या बदलामुळे आता एक नवी अडचण निर्माण झाली आहे. सुट्ट्या पैशांची समस्या आता ग्राहकांना सतावत आहे. कंपन्यांनी वस्तूंच्या किमती कमी केल्या आहेत, पण त्या अशा आकड्यांमध्ये आहेत की, रोख व्यवहार करणे ग्राहकांसाठी कठीण झाले आहे.
या बदलाचा सर्वात मोठा परिणाम बिस्किट, चॉकलेट, आणि शॅम्पू यांसारख्या लहान पॅकवर दिसून येत आहे. उदाहरणार्थ, आतापर्यंत 5 रुपयांना मिळणारा ‘पारले-जी’ (Parle-G) बिस्किटाचा पुडा 4.45 रुपयांना मिळत आहे. त्याचप्रमाणे, 1 रुपयाचे चॉकलेट 88 पैशांना आणि 2 रुपयांची शॅम्पूची पुडी 1.77 रुपयांना झाली आहे.
या किमती रोखीत देणे ग्राहकांना अशक्य असल्याने त्यांना मूळ किंमतच द्यावी लागत आहे, आणि याचा फायदा किरकोळ विक्रेत्यांना होत आहे. ग्राहकांपर्यंत जीएसटी कपातीचा पूर्ण लाभ पोहोचत नसल्याबद्दल अनेक प्रश्न उपस्थित केले जात आहेत.
कंपनीनेही आपल्या सर्व उत्पादनांच्या किमती कमी केल्या आहेत. त्यानुसार, 30 रुपयांचे बॉर्नविटा आता 26.69 रुपयांना, 10 रुपयांचे ओरियो बिस्किट 8.90 रुपयांना, आणि 20 रुपयांचे जेम्स आणि 5 स्टार पॅक 17.80 रुपयांना उपलब्ध झाले आहेत. या सर्व कंपन्यांना वाटते की, जीएसटी कपातीचा फायदा ग्राहकांपर्यंत पोहचला पाहिजे. परंतु सध्या तरी, नगद व्यवहार करणाऱ्या ग्राहकांसाठी ही एक मोठी समस्या बनली आहे. कंपन्यांचा उद्देश चांगला असला तरी, या नवीन किमतींमुळे ग्राहकांना त्यांचा हक्क मिळवण्यासाठी संघर्ष करावा लागत आहे.
