पुणे: पुण्यातील वाघोली परिसरात महाविद्यालयीन विद्यार्थ्यावर (Pune Crime) कोयत्याने प्राणघातक हल्ला झाल्याची धक्कादायक घटना घडली आहे. रायसोनी कॉलेजसमोरील एका हॉटेलमध्ये चहा पित असताना नागेश जगताप या विद्यार्थ्यावर मंगेश सांगळे आणि त्याच्या दोन साथीदारांनी हल्ला केल्याचे समोर आले आहे. या घटनेमुळे वाघोली आणि लोणीकंद परिसरात मोठी खळबळ उडाली असून विद्यार्थ्यांमध्ये भीतीचे वातावरण निर्माण झाले आहे. (Latest Marathi News)
मिळालेल्या माहितीनुसार, नागेश जगताप आणि त्याचा मित्र सिद्धेश हे दोघे रायसोनी कॉलेजसमोरील हॉटेलमध्ये चहा पिण्यासाठी बसले होते. त्यावेळी आरोपी मंगेश सांगळे आपल्या दोन साथीदारांसह तेथे आला. जुन्या वादातून “तू मला शिवी का दिली होतीस?” असा जाब विचारत त्याने नागेशशी वाद घालण्यास सुरुवात केली. काही क्षणांतच हा वाद हाणामारीत बदलला.
यानंतर आरोपींनी सोबत आणलेल्या कोयत्यांनी नागेशवर हल्ला केला. त्याच्या पाठीवर आणि अंगावर वार करण्यात आले. शेवटी डोक्यावर जोरदार वार करण्यात आला. हा वार इतका तीव्र होता की कोयता नागेशच्या डोक्यातच अडकून राहिल्याची माहिती समोर आली आहे. या भीषण हल्ल्यानंतर नागेश रक्ताच्या थारोळ्यात कोसळला.
नागेशला वाचवण्यासाठी पुढे आलेल्या त्याचा मित्र सिद्धेशवरही आरोपींनी हल्ला केला. या मारहाणीत तोही गंभीर जखमी झाला आहे. दोन्ही जखमींना तातडीने जवळच्या रुग्णालयात दाखल करण्यात आले असून नागेशची प्रकृती चिंताजनक असल्याचे समजते.
भरदिवसा कॉलेज परिसरात घडलेल्या या प्रकारामुळे परिसरात दहशतीचे वातावरण निर्माण झाले आहे. विद्यार्थ्यांच्या सुरक्षेचा प्रश्न पुन्हा ऐरणीवर आला आहे. या प्रकरणी पोलिसांनी खुनाचा प्रयत्न केल्याचा गुन्हा दाखल केला असून फरार आरोपींच्या शोधासाठी पथके रवाना करण्यात आली आहेत.
