पुणे : शहरात वाढत्या गुन्हेगारीच्या पार्श्वभूमीवर भारती विद्यापीठ परिसरातील एक धक्कादायक खून प्रकरण समोर आले आहे. देहविक्रय करणाऱ्या एका महिलेचा निर्घृण खून करून तिचा मृतदेह कोंढवा येथील (Pune Crime) जुन्या दगडखाणीत फेकून दिल्याचा आरोप आहे. या प्रकरणी पोलिसांनी खुनाचा गुन्हा दाखल केला असून तपास वेगाने सुरू आहे. (Breaking News)
गेल्या आठवड्यात कोंढवा परिसरातील एका बंद खाणीत अज्ञात महिलेचा मृतदेह आढळून आला होता. सुरुवातीला अपघाताचा संशय व्यक्त करण्यात आला; मात्र शवविच्छेदन अहवालात महिलेच्या शरीरावर गंभीर मारहाणीच्या खुणा, तसेच हात-पायांवर फ्रॅक्चर आढळल्याने हा घातपात असल्याचे स्पष्ट झाले. त्यानंतर तपासाची दिशा बदलली.
प्राथमिक तपासानुसार, आरोपींनी संबंधित महिलेला जबरदस्तीने रिक्षामध्ये बसवून खडी मशीन चौक परिसरात नेले. तेथे तिच्यासोबत शारीरिक संबंध ठेवण्यात आले. त्यानंतर पैशांवरून किंवा इतर कारणावरून वाद निर्माण झाला. संतापाच्या भरात आरोपींनी काठीने तिची बेदम मारहाण केली आणि नंतर तिला दगडाच्या खाणीत ढकलून दिल्याचा आरोप आहे. उंचावरून पडल्याने आणि आधी झालेल्या मारहाणीमुळे तिचा मृत्यू झाला असावा, असा प्राथमिक अंदाज आहे.
तपासात महत्त्वाची बाब म्हणजे मृत महिला आणि मुख्य आरोपी एकमेकांच्या परिचयातील असल्याचे समोर आले आहे. दोघांमध्ये काही काळापासून संपर्क होता. दारूच्या व्यसनामुळे वाद वाढल्याची शक्यता पोलिसांनी व्यक्त केली आहे. या प्रकरणात एकूण सहा जणांचा सहभाग असल्याचे निष्पन्न झाले असून त्यापैकी दोघांना अटक करण्यात आली आहे. उर्वरित आरोपींचा शोध सुरू आहे.
सीसीटीव्ही फुटेजमध्ये रिक्षा आढळल्यानंतर आरोपींनी ओळख पटू नये म्हणून रिक्षाच्या काही भागात बदल केल्याचेही उघड झाले आहे. भारती विद्यापीठ पोलिस ठाणे आणि पुणे गुन्हे शाखेच्या संयुक्त पथकाकडून पुढील तपास सुरू आहे. या घटनेमुळे परिसरात भीतीचे वातावरण निर्माण झाले असून निर्जन खाणींमध्ये सुरक्षा वाढवण्याची मागणी स्थानिकांकडून केली जात आहे.
