Pune Crime : पुणे : वहिनीवर अत्याचार केल्याच्या प्रकरणात बारामती येथील अतिरिक्त सत्र न्यायालयाने आरोपीला 10 वर्षे सक्तमजुरी आणि 20 हजार रुपये दंडाची शिक्षा सुनावली आहे. पीडित महिलेची साक्ष विश्वासार्ह असल्याचे न्यायालयाने नमूद केले असून तिच्या साक्षीला पती, वैद्यकीय अधिकारी आणि न्यायवैद्यक तपासणी अहवालानेही पुष्टी दिली. अतिरिक्त सत्र न्यायाधीश बी. डी. शेळके यांनी हा निकाल दिला.
या प्रकरणी पीडित महिलेने बारामती शहर पोलीस ठाण्यात तक्रार दाखल केली होती. त्यानुसार आरोपीविरुद्ध भारतीय दंड संहितेनुसार गुन्हा नोंदवण्यात आला. ही घटना 14 जून 2024 रोजी दुपारी सुमारे 3.30 वाजता बारामतीतील प्रगतीनगर परिसरात घडली होती.
माहितीनुसार, पीडित महिलेचे पती सुरक्षारक्षक म्हणून काम करतात. घटनेच्या दिवशी ते कामावर गेले असताना आरोपी दुपारी सुमारे 1 वाजता महिलेच्या घरी आला. त्यावेळी पीडितेने त्याला चहा दिला. काही वेळानंतर ती पुन्हा चहा करण्यासाठी स्वयंपाकघरात गेली असता आरोपीने तिच्यावर अत्याचार केल्याचे तक्रारीत नमूद करण्यात आले आहे. या घटनेबाबत कोणाला सांगितल्यास जीवे मारण्याची धमकीही आरोपीने दिल्याचे पीडितेने सांगितले.
घाबरलेल्या अवस्थेत पीडितेने पतीच्या कामाच्या ठिकाणी जाऊन त्यांना घटनेची माहिती दिली. त्यानंतर दोघांनी बारामती शहर पोलीस ठाण्यात तक्रार दाखल केली. या खटल्यात अतिरिक्त सरकारी वकील के. एस. नवले यांनी सरकार पक्षाची बाजू मांडली. न्यायालयात एकूण 5 साक्षीदारांची साक्ष नोंदवण्यात आली. पुरावे आणि साक्षी विचारात घेऊन न्यायालयाने आरोपीला दोषी ठरवत शिक्षा सुनावली. तसेच पीडित महिलेच्या पुनर्वसनासाठी जिल्हा विधी सेवा प्राधिकरणाने भरपाई देण्याचे आदेशही दिले.
