Pune Crime : लोणी काळभोर, ता. 28 : पिरसाहेबांच्या उरूस यात्रेत भर चौकात कोयता काढून तरुणावर हल्ला केल्याची धक्कादायक घटना घडली आहे. ही घटना कुंजीरवाडी (ता. हवेली) ग्रामपंचायत हद्दीत बुधवारी (ता. 25) रात्री नऊ वाजण्याच्या सुमारास घडली. या हल्ल्यात एक जण जखमी झाला असून लोणी काळभोर पोलिसांनी तत्काळ दोघांना ताब्यात घेतले आहे. जुन्या वादाच्या रागातून हा हल्ला झाल्याने गावात खळबळ उडाली आहे.
प्रविण राजाभाऊ घोडके (वय 21, रा. मगरवस्ती, म्हतोबाची आळंदी रोड, म्हतोबाची आळंदी, ता. हवेली, जि. पुणे) आणि ऋषीकेश नाना लोंढे (रा. 12 फाटा चौकी, जयगणेश पार्क, कुंजीरवाडी, ता. हवेली, जि. पुणे) तसेच त्यांच्या इतर दोन मित्रांविरुद्ध गुन्हा दाखल करण्यात आला आहे. याप्रकरणी गौरव सुदर्शन खलसे (वय 24, रा. माळवाडी, कुंजीरवाडी, ता. हवेली) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गौरव खलसे हा त्याचा मित्र आदेश बरडे याच्यासोबत यात्रेत गेला होता. रात्री 9 वाजण्याच्या सुमारास दोघे घरी परतत असताना बाजार मैदान परिसरात काही तरुणांनी त्यांचा रस्ता अडवला. पूर्वी झालेल्या वादाचा राग मनात धरून प्रविण घोडके याने कमरेला लपवलेला लोखंडी कोयता बाहेर काढून थेट गौरववर हल्ला केला.
कोयत्याच्या पाठीमागील बोथट बाजूने उजव्या हातावर आणि पाठीवर वार करून गौरव खलसे यांना जखमी करण्यात आले. त्याच वेळी ऋषीकेश लोंढे व इतर दोघांनी लाथाबुक्क्यांनी मारहाण करत शिवीगाळ व दमदाटी केली. अचानक झालेल्या या प्रकारामुळे यात्रेतील वातावरण तणावपूर्ण झाले.
गौरव आणि त्याचा मित्र कसाबसा सुटून घरी पळाले. मात्र, जुन्या कॅनॉल पुलावर नागरिकांची गर्दी जमल्याचे पाहून ते पुन्हा घटनास्थळी गेले. हातात कोयता घेऊन फिरणाऱ्या आरोपींना पाहून संतप्त नागरिकांनी त्यांना जाब विचारला. आरोपींनी लोकांनाही शिवीगाळ केल्याने काही नागरिकांनी त्यांना मारहाण केल्याची माहिती प्रत्यक्षदर्शींनी दिली.
दरम्यान, नागरिकांनी पोलिसांना कळविल्यानंतर पोलिसांनी घटनास्थळी धाव घेत प्रविण घोडके आणि ऋषीकेश लोंढे यांना ताब्यात घेतले, तर त्यांच्या दोन साथीदारांनी अंधाराचा फायदा घेत पसार झाले. या प्रकरणी लोणी काळभोर पोलीस ठाण्यात भारतीय न्याय संहिता कलम 115(1), 3(5), 351(2), 351(3), 352 तसेच शस्त्र अधिनियम 25(4) आणि महाराष्ट्र पोलीस अधिनियम 37(1), (2), (3) अन्वये गुन्हा दाखल करण्यात आला आहे. यात्रेसारख्या धार्मिक आणि सामाजिक कार्यक्रमात उघडपणे कोयता घेऊन तरुणावर हल्ला केल्यामुळे ग्रामस्थांमध्ये संतापाची लाट उसळली आहे. फरार आरोपींचा शोध सुरू असून पुढील तपास सुरू आहे.
