Pune Crime: पुणे : अहिल्यानगर येथून बसने पुण्यात येऊन दुचाकी चोरी करून पुन्हा त्याच गाडीवरून परत जाणाऱ्या एका सराईत चोराला पिंपरी-चिंचवड गुन्हे शाखेच्या युनिट 2 ने अटक केली आहे. या कारवाईत पोलिसांनी मोठ्या प्रमाणात चोरीच्या दुचाकी जप्त केल्या असून अनेक गुन्ह्यांचा उलगडा झाला आहे. आरोपीकडून सुमारे 21 लाख 66 हजार रुपये किमतीच्या 40 दुचाकी जप्त करण्यात आल्या आहेत.
पोलिसांनी दिलेल्या माहितीनुसार, आश्पाक इसाक पठाण (वय 32, रा. पाथर्डी, जि. अहिल्यानगर) असे अटक करण्यात आलेल्या आरोपीचे नाव आहे. तो शिक्षणाने पदवीधर असूनही दुचाकी चोरीच्या गुन्ह्यांमध्ये सक्रिय होता. चोरीच्या दुचाकी विकत घेणारा त्याचा साथीदार मुकुंद उद्धवराव हारदास यालाही पोलिसांनी अटक केली आहे. या प्रकरणाची माहिती अपर पोलीस आयुक्त सारंग आवाड यांनी दिली.
बावधन पोलीस ठाण्याच्या हद्दीत दुचाकी चोरीच्या घटनांमध्ये वाढ झाल्याने पोलिसांनी तपास सुरू केला होता. तपासादरम्यान परिसरातील अनेक सीसीटीव्ही कॅमेऱ्यांचे फुटेज तपासण्यात आले. तसेच तांत्रिक माहिती आणि गुप्त बातमीदारांच्या मदतीने आरोपीचा माग काढण्यात आला. 7 मार्च रोजी बालेवाडी परिसरात पोलिसांनी सापळा रचून आश्पाक पठाण याला ताब्यात घेतले.
चौकशीदरम्यान आरोपीने अनेक ठिकाणी दुचाकी चोरी केल्याची कबुली दिली. तो बसने पुण्यात येत असे आणि संधी मिळताच दुचाकी चोरी करून त्याच वाहनावरून पुन्हा नगरकडे जात असे. चोरी केलेल्या दुचाकी कमी किमतीत आपल्या साथीदाराला विकत असल्याचेही तपासात समोर आले आहे.
या कारवाईमुळे पुणे आणि पिंपरी-चिंचवड परिसरातील वाहनचोरीच्या एकूण 34 गुन्ह्यांचा उलगडा झाला आहे. पोलिसांनी आरोपींकडून जप्त केलेल्या दुचाकींची तपासणी सुरू केली असून या प्रकरणाचा पुढील तपास सुरू आहे. तसेच या टोळीने आणखी कुठे गुन्हे केले आहेत का याचाही तपास पोलिस करत आहेत.
