लोणी काळभोर, ता. 12 : पुणे सोलापूर राष्ट्रीय महामार्ग ओलांडताना एका कामगाराला अज्ञात वाहनाने धडक दिल्याची घटना घडली आहे. ही घटना लोणी स्टेशन (ता. हवेली) परिसरातील प्यासा हॉटेलसमोर 27 फेब्रुवारी रोजी रात्री सुमारे 9 वाजण्याच्या सुमारास घडली आहे . या अपघातात गंभीर जखमी झालेल्या एका कामगाराचा उपचारादरम्यान मृत्यू झाल्याची दुर्दैवी घटना उघडकीस आली आहे. या प्रकरणी अज्ञात वाहन चालकाविरोधात लोणी काळभोर पोलिस ठाण्यात गुन्हा दाखल करण्यात आला असून पोलिसांकडून चालकाचा शोध सुरू आहे.
गणेश छगन अल्हाट (रा. लोणी काळभोर) यांचा अपघातात मृत्यू झाला आहे. याप्रकरणी अभिषेक राजेंद्र क्षिरसागर (वय 22, व्यवसाय – सेल्समेन, रा. कदमवाकवस्ती, लोणी काळभोर) यांनी लोणी काळभोर पोलिस ठाण्यात फिर्याद दिली आहे. त्यानुसार अज्ञात वाहनावरील अनोळखी चालकावर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी अभिषेक क्षिरसागर ही 27 फेब्रुवारी 2026 रोजी सकाळी कामावर गेले होते. त्यानंतर त्यांचे मामा गणेश अल्हाट हेही सकाळी सेंट्रींगच्या कामासाठी घराबाहेर पडले. मात्र रात्री उशिरापर्यंत ते घरी परतले नाहीत. कामाच्या कारणाने ते कधी कधी दोन दिवस बाहेर राहत असल्याने कुटुंबीयांनी त्याकडे दुर्लक्ष केले. दरम्यान, 1 मार्च रोजी सायंकाळी फिर्यादीची आजी सिंधू रणदिवे या भाजी आणण्यासाठी प्यासा हॉटेल परिसरात गेल्या असता, ओळखीच्या महिलेने 27 फेब्रुवारी रोजी त्या ठिकाणी गणेश अल्हाट यांचा अपघात झाल्याची माहिती दिली. ही बाब समजताच कुटुंबीयांमध्ये एकच खळबळ उडाली.
त्यानंतर अभिषेक क्षिरसागर यांनी विश्वराज हॉस्पिटल येथे चौकशी केली असता, गणेश अल्हाट यांना गंभीर जखमी अवस्थेत तेथून पुढील उपचारासाठी ससून रुग्णालयात हलविण्यात आल्याचे समजले. ससून रुग्णालयात ते आयसीयू वॉर्ड क्रमांक 7 मध्ये दाखल होते. अपघातात त्यांच्या उजव्या पायाला फ्रॅक्चर, पाठीच्या मणक्याला गंभीर दुखापत तसेच डोक्याला मार लागल्याचे डॉक्टरांनी सांगितले. काही दिवस उपचार सुरू असतानाच 4 मार्च रोजी रात्री साडेदहा वाजण्याच्या सुमारास डॉक्टरांनी त्यांना मृत घोषित केले. त्यानंतर ससून रुग्णालयात शवविच्छेदन करून मृतदेह कुटुंबीयांच्या ताब्यात देण्यात आला. पुणे रेल्वे स्थानकाजवळील कैलास स्मशानभूमीत त्यांच्या पार्थिवावर अंत्यसंस्कार करण्यात आले.
दरम्यान, अज्ञात वाहन चालकाने बेदरकारपणे वाहन चालवत गणेश अल्हाट यांना जोराची धडक दिली. अपघातानंतर चालकाने जखमी व्यक्तीस कोणतीही मदत न करता घटनास्थळावरून पळ काढल्याचा आरोप फिर्यादीत करण्यात आला आहे. या प्रकरणी अज्ञात वाहन चालकाविरोधात भारतीय न्याय संहिता कलम 125 (ब), 281 तसेच मोटार वाहन कायदा कलम 119, 134, 177 व 184 अन्वये लोणी काळभोर पोलिस ठाण्यात गुन्हा दाखल करण्यात आला असून पुढील तपास सुरू आहे.
