Pune : पुण्यात रामनवमीच्या पार्श्वभूमीवर आज शहरातील मध्यवर्ती भागात मोठ्या प्रमाणावर मिरवणुका निघणार असल्याने वाहतुकीत व्यापक बदल करण्यात आले आहेत. सायंकाळी 4 ते रात्री 10 या वेळेत बाजीराव रस्ता, टिळक रस्ता आणि लष्कर परिसरातील अनेक प्रमुख मार्गांवर वाहतूक वळविण्यात येणार आहे. दरवर्षीप्रमाणे यंदाही या मिरवणुकांमध्ये मोठ्या संख्येने नागरिक सहभागी होणार असल्याने गर्दी आणि कोंडी टाळण्यासाठी प्रशासनाने ही उपाययोजना केली आहे.
विश्रामबाग परिसरात पुरम चौकातून बाजीराव रस्त्याने शिवाजीनगरकडे जाणाऱ्या वाहनांना प्रवेश बंद राहील. या वाहनांना टिळक रस्त्याने वळवून अलका टॉकीज चौक आणि खंडुजी बाबा चौक मार्गे पुढे सोडण्यात येईल. तर लष्कर भागात वाय जंक्शनहून एमजी रोडकडे येणारी वाहतूक थांबविण्यात येणार असून, मिरवणुकीच्या हालचालीनुसार 15 ऑगस्ट चौक, महमंद रफी चौक आणि कोहिनूर हॉटेल परिसरात टप्प्याटप्प्याने बदल केले जातील.
काही ठिकाणी वाहतूक पूर्णपणे बंद ठेवून ती ईस्ट स्ट्रीट, भोपळे चौक, कुरेशी मशीद आणि सेंटर स्ट्रीट या पर्यायी मार्गांनी वळवली जाणार आहे. अत्यावश्यक सेवा वगळता इतर वाहनांवर निर्बंध असतील, त्यामुळे खासगी वाहनधारकांनी शक्यतो सार्वजनिक वाहतूक किंवा पर्यायी मार्गांचा वापर करणे योग्य ठरेल.
दरम्यान, टिळक स्मारक ते पेरूगेट दरम्यानचा रस्ता दुपारी सुमारे 12.30 ते 1 दरम्यान अचानक बंद करण्यात आल्याने नागरिकांना अडचणींचा सामना करावा लागला. या निर्णयाबाबत स्पष्ट माहिती न दिल्याने प्रशासनातील समन्वयाचा अभाव उघड झाला. वाहतूक पोलिस आणि स्थानिक पोलिस यांच्यात जबाबदारीबाबत संभ्रम दिसून आला, ज्यामुळे नागरिकांचा त्रास वाढला.
