Pune Accident: पुणे : पुणे शहर आणि परिसरात अपघातांची मालिका सुरूच असून आणखी एक गंभीर अपघात (Accident) समोर आला आहे. मुंबई–पुणे एक्सप्रेसवे आणि कात्रज परिसर अपघातांसाठी वारंवार चर्चेत असताना, कात्रज येथील नवले पूल परिसरात ट्रक आणि एसटी बसमध्ये भीषण धडक झाली. या अपघातात ट्रक चालकाचा मृत्यू (Death) झाला असून क्लीनर गंभीर अवस्थेत अडकला होता.
मिळालेल्या माहितीनुसार, लोखंडी पाइप घेऊन जाणारा ट्रक कात्रज बोगदा उतारावरून नवले पुलाच्या दिशेने येत होता. जांभुळवाडी येथील दरी पुलाजवळ अचानक चालकाचे ट्रकवरील नियंत्रण सुटले आणि समोरून जात असलेल्या एसटी बसला ट्रकने जोरदार धडक दिली. धडक इतकी तीव्र होती की ट्रकचा पुढील भाग पूर्णपणे तुटला. या अपघातात ट्रक चालक गंभीर जखमी झाला. त्याला तातडीने रुग्णालयात दाखल करण्यात आले, मात्र उपचारादरम्यान त्याचा मृत्यू झाला.
अपघात इतका भीषण होता की..
अपघातानंतर ट्रकचा क्लीनर केबिनमध्ये अडकला होता. त्याला बाहेर काढण्यासाठी अग्निशमन दलाने तातडीने मदतकार्य सुरू केले. बसमधील 4 ते 5 प्रवासी किरकोळ जखमी झाले असून त्यांना उपचारासाठी जवळच्या रुग्णालयात हलवण्यात आले. या घटनेमुळे प्रवाशांमध्ये भीतीचे वातावरण निर्माण झाले होते.
घटनेची माहिती मिळताच पोलीस, अग्निशमन दल आणि राष्ट्रीय महामार्ग प्राधिकरण यांचे पथक तात्काळ घटनास्थळी पोहोचले. अपघातग्रस्त वाहने बाजूला करण्याचे काम करण्यात आले. या अपघातामुळे पुणे-सातारा मार्गावर काही काळ मोठी वाहतूक कोंडी झाली होती. सध्या पोलीस या अपघाताचे नेमके कारण शोधत असून पुढील तपास सुरू आहे.
