पुणे, ता. ६ : वानवडी परिसरातील परमार गॅलरी येथील ‘स्काय स्पा’ या मसाज सेंटरमध्ये मसाजच्या नावाखाली देहविक्रीचा व्यवसाय सुरू असल्याची गोपनीय माहिती मिळाल्यानंतर वानवडी पोलिसांनी अत्यंत नियोजनबद्ध पद्धतीने छापा टाकत ४ जुलै रोजी या रॅकेटचा पर्दाफाश केला. या कारवाईत स्पा सेंटरचा मालक आणि व्यवस्थापिकेविरुद्ध गुन्हा दाखल करण्यात आला असून, तीन महिलांची सुटका करण्यात आली आहे. तसेच रोकड, डीव्हीआर, रेट कार्ड, कंडोम, नोंदींची वही आणि अन्य साहित्य असा मुद्देमाल जप्त करण्यात आला आहे.
व्यवस्थापिका रुबीका ऊर्फ लालरेम्पपुई थाँगलियाना (वय ३३, मूळ रा. मिझोराम, सध्या कोंढवा) आणि स्पा मालक गोविंद रामचंद्र धारवल (वय २६, रा. गोसावी वस्ती, हडपसर) अशी गुन्हा दाखल करण्यात आलेल्यांची नावे आहेत. याप्रकरणी पोलीस अंमलदार संदीप आनंदा साळवे यांनी वानवडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, वानवडी पोलिसांना ‘स्काय स्पा’ येथे मसाजच्या नावाखाली परराज्यातील महिलांकडून देहविक्री करून घेतली जात असल्याची गोपनीय माहिती मिळाली होती. वरिष्ठ अधिकाऱ्यांच्या आदेशानुसार पोलीस निरीक्षक (गुन्हे) कैलास डाबेराव यांच्या मार्गदर्शनाखाली कारवाईचे नियोजन करण्यात आले. पोलिसांनी प्रथम एक बनावट ग्राहक स्पा सेंटरमध्ये पाठवून माहितीची खातरजमा केली. संबंधित ठिकाणी मसाजबरोबर लैंगिक संबंधासाठी पैशांची मागणी होत असल्याची खात्री होताच पोलिसांनी तत्काळ छापा टाकला. छाप्यात स्पा सेंटरमधील विविध खोल्यांमध्ये ग्राहकांसोबत तीन महिला आढळून आल्या.
चौकशीत स्पा सेंटरची व्यवस्थापिका रुबीका ऊर्फ लालरेम्पपुई थाँगलियाना आणि स्पा मालक गोविंद रामचंद्र धारवल हे ग्राहकांकडून पैसे घेऊन महिलांकडून देहविक्री करून घेत असल्याचे उघड झाल्याचा दावा पोलिसांनी केला आहे. संबंधित महिलांनीही त्यांना पैशांचे आमिष दाखवून या व्यवसायात आणल्याचे पोलिसांसमोर सांगितल्याचे फिर्यादीत नमूद करण्यात आले आहे. कारवाईदरम्यान पोलिसांनी स्पा सेंटरमधून २,४०० रुपयांची रोकड, डीव्हीआर, रेट कार्ड, नोंदींची वही, मसाज ऑइल, कंडोमची पाकिटे, बेडशीटसह विविध साहित्य जप्त केले. जप्त केलेल्या वहीत ग्राहकांची नावे, मोबाईल क्रमांक, व्यवहाराच्या नोंदी आणि आर्थिक देवाणघेवाणीची माहिती आढळल्याचे पोलिसांनी सांगितले.
यावेळी स्पा सेंटरमध्ये काम करणारा कार्यालयीन कर्मचारीही पोलिसांच्या हाती लागला. त्यानेदेखील ग्राहकांकडून पैसे घेऊन मसाजच्या नावाखाली देहविक्री सुरू असल्याची माहिती पोलिसांना दिल्याचे फिर्यादीत नमूद करण्यात आले आहे. या प्रकरणी स्पा मालक गोविंद रामचंद्र धारवल आणि व्यवस्थापिका रुबीका ऊर्फ लालरेम्पपुई थाँगलियाना यांच्याविरुद्ध अनैतिक मानवी वाहतूक (प्रतिबंध) कायदा, १९५६ मधील कलम ३, ४ व ५ तसेच भारतीय न्याय संहिता अंतर्गत संबंधित कलमान्वये गुन्हा दाखल करण्यात आला असून, पुढील तपास वानवडी पोलीस करीत आहेत.
