पुणे : पुण्यातील एका पोलीस निरीक्षकास निलंबित केल्याची बातमी समोर आली आहे. लोकसभा निवडणुकीपासून विविध सणउत्सवाच्या काळात महत्वाचे बंदोबस्त असतानाही तब्बल 71 दिवस आरोग्याच्या कारणास्तव रजेवर गेलेल्या व त्यानंतर आजतागायत विनापरवाना गैरहजर राहिलेल्या पोलीस निरीक्षकास पोलीस आयुक्त अमितेश कुमार यांनी अखेर निलंबित केले आहे. अजित पोपटराव गावित असे निलंबित केलेल्या पोलीस निरीक्षकाचे नाव आहे.
मिळालेल्या माहितीनुसार, अजित गावित यांची पर्वती पोलीस ठाण्यात पोलीस निरीक्षक म्हणून नियुक्ती करण्यात आली होती. पर्वती पोलीस ठाण्याच्या हद्दीत झोपडपट्टीचे प्रमाण जास्त असून अतिसंवेदनशील भाग आहे. रंगपंचमी, शिवजयंती,धुलीवंदन, रमजान ईद, डॉ. बाबासाहेब आंबेडकर जयंती, रामनवमी, हनुमान जयंती, लोकसभा निवडणुक 2024 अशा महत्वाच्या वेळी बंदोबस्तास हजर राहणे आवश्यक असतानाही अजित गावित हे आरोग्य रजेवर गेलेले होते.
गावीत 18 मार्च ते 27 मे 2025 पर्यंत असे एकूण 71 दिवस रजेवर गेले होते. त्यानंतर 28 मे 2024 रोजी एक दिवस ते हजर राहीले. त्यानंतर परत 29 मे 2024 पासून आजतागायत कुठलीही परवानगी न घेता ते गैरहजर राहिले. त्यामुळे अखेर अजित गावित यांना पोलीस आयुक्त अमितेश कुमार यांनी निलंबित केले आहे.