पुणे: पुणे जिल्ह्यातील शिक्रापूर परिसरात मानवी आरोग्याशी खेळ करणाऱ्या अवैध व्यवसायावर पोलिसांनी मोठी कारवाई केली आहे. शिरूर तालुक्यातील केंदूर (पऱ्हाडमळा) येथे छापा टाकून पानामध्ये मिसळून विक्रीसाठी ठेवलेली संशयित अपायकारक पावडर जप्त करण्यात आली आहे. या प्रकरणी एका तरुणाविरुद्ध गुन्हा दाखल करण्यात आला असून न्यायालयाने त्याला तीन दिवसांची पोलीस कोठडी सुनावली आहे.
गोपनीय माहितीच्या आधारे शिक्रापूर पोलीस ठाण्याचे पोलीस निरीक्षक चंद्रशेखर यादव यांनी तातडीने कारवाईचे आदेश दिले. त्यानुसार पोलीस उपनिरीक्षक अंकुश कारंडे यांच्या नेतृत्वाखाली विशेष पथक, दोन पंच आणि फॉरेन्सिक तज्ज्ञांसह केंदूर येथील पहाडमळा परिसरात छापा टाकण्यात आला.
कारवाईदरम्यान तुषार राहुल पऱ्हाड (वय २६, रा. पऱ्हाडमळा, केंदूर, ता. शिरूर, जि. पुणे) याच्या घरामागील पत्राशेडची झडती घेतली असता, लाल रंगाच्या टेबलावरील बॉक्समध्ये प्लास्टिकच्या पिशवीत ठेवलेली उग्र वासाची संशयित पावडर आढळून आली. प्राथमिक माहितीनुसार, ही पावडर पानामध्ये मिसळून व्यसनासाठी ग्राहकांना दिली जात होती.
फॉरेन्सिक तज्ज्ञांनी घटनास्थळीच पावडरची प्राथमिक तपासणी केली. पंचांसमक्ष संशयित माल जप्त करण्यात आला. त्यातील प्रत्येकी १० ग्रॅमचे दोन नमुने रासायनिक विश्लेषणासाठी स्वतंत्रपणे सीलबंद करण्यात आले, तर उर्वरित ८५ ग्रॅम पावडर नियमानुसार जप्त करून तपासासाठी पाठवण्यात आली आहे.
या प्रकरणी तुषार राहुल पहाड याच्याविरुद्ध भारतीय न्याय संहिता (BNS) कलम १२३ अंतर्गत गुन्हा दाखल करण्यात आला असून त्याला अटक करण्यात आली आहे. प्रथमवर्ग न्यायदंडाधिकारी, शिरूर यांनी आरोपीला तीन दिवसांची पोलीस कोठडी सुनावली असून पुढील तपास शिक्रापूर पोलीस करत आहेत.
ही कारवाई पोलीस अधीक्षक संदीपसिंह गिल, अपर पोलीस अधीक्षक डॉ. शुभम कुमार आणि उपविभागीय पोलीस अधिकारी रवींद्र भोसले यांच्या मार्गदर्शनाखाली पोलीस निरीक्षक चंद्रशेखर यादव, पोलीस उपनिरीक्षक अंकुश कारंडे, सोमनाथ कचरे, धनंजय थेऊरकर आणि विशाल देशमुख यांच्या पथकाने केली.
खायचे पानामधून व्यसन करणे या मानवी आरोग्याशी खेळ करणाऱ्या अवैध प्रकारची माहिती मिळताच तातडीने धडक कारवाई केली जाईल. नागरिकांनीही अशी माहिती पोलिसांना निर्भयपणे द्यावी. माहिती देणाऱ्याचे नाव गोपनीय ठेवले जाईल.
~चंद्रशेखर यादव,पोलीस निरीक्षक
