मुंबई: मुंबईतील बोरीवली परिसरातील हॉटेलच्या डोशामध्ये उंदीर आढळल्याच्या घटनेनंतर आता या प्रकरणाला वेगळेच वळण मिळाले आहे. घटनेचा व्हिडिओ सोशल मीडियावर व्हायरल झाल्यानंतर हॉटेलचा परवाना अन्न व औषध प्रशासनाकडून निलंबित करण्यात आला होता. त्यानंतर हा व्हिडिओ पुढे व्हायरल न करण्यासाठी तसेच पोलिसांत तक्रार करू नये यासाठी हॉटेल मालकाकडे २५ लाख रुपयांची खंडणी मागितल्याचा प्रकार समोर आला आहे. याप्रकरणी बोरीवली पोलिसांनी सापळा रचून खंडणीची रक्कम स्वीकारताना एका महिलेला ताब्यात घेतले असून दोन महिलांविरोधात गुन्हा दाखल केला आहे.
बोरीवली पश्चिम येथील हॉटेल-बँक्वेट-फास्ट फूडचे मालक जय शाह यांनी पोलिसांकडे याबाबत तक्रार दिली आहे. त्यांच्या तक्रारीनुसार, २४ सप्टेंबर रोजी रात्री हॉटेलमध्ये आलेल्या ग्राहकाच्या डोशात उंदीर आढळला. यानंतर हॉटेलमध्ये गोंधळ झाला आणि पोलिसांना बोलावण्यात आले. या घटनेचा व्हिडिओ तयार करण्यात आला. २६ सप्टेंबरपासून हा व्हिडिओ सोशल मीडियावर मोठ्या प्रमाणात व्हायरल झाला. त्यानंतर २८ सप्टेंबरला प्रशासनाने हॉटेलचा परवाना निलंबित केला.
परवाना निलंबित झाल्यानंतर जय शाह यांना धमकीचे फोन येऊ लागले. व्हिडिओ व्हायरल न करणे आणि पोलिसांत तक्रार मागे घेण्यासाठी सुरुवातीला २५ लाख रुपयांची मागणी करण्यात आली. चर्चेनंतर ही रक्कम २० लाख, १५ लाख आणि अखेरीस सात लाख रुपयांवर आणण्यात आल्याचे तक्रारीत नमूद आहे. त्यापैकी एक लाख रुपये रोख दिल्यानंतरही उर्वरित सहा लाखांसाठी फोन आणि व्हॉट्सॲपवरून धमक्या दिल्याचा आरोप आहे.
यानंतर शाह यांनी बोरीवली पोलिसांकडे धाव घेतली. ५ ऑक्टोबर रोजी सहा लाख रुपये देण्याचे ठरल्याने पोलिसांनी पंचांसमक्ष सापळा रचला. ठरलेल्या वेळी खंडणीची रक्कम स्वीकारताना एका महिलेला पोलिसांनी रंगेहाथ ताब्यात घेतले. या प्रकरणात आणखी कोणाचा सहभाग आहे का, याचा तपास बोरीवली पोलिसांकडून सुरू आहे.
