पुणे : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉकरोच जनता पार्टी येत्या 10 ऑक्टोबरला दिल्लीत निदर्शने करणार आहे. या आंदोलनामुळे राजधानीत राजकीय वातावरण तापण्याची शक्यता असतानाच, पक्षाच्या वरिष्ठ नेत्यांच्या अडचणी वाढल्या आहेत. 20 जुलै रोजी दिल्लीतील संसद मार्चदरम्यान घडलेल्या हिंसाचाराचा तपास दिल्ली पोलिसांच्या गुन्हे शाखेने तीव्र केला आहे.
या हिंसेप्रकरणी पोलिसांनी BNS मधील विविध कलमांन्वये गुन्हे नोंदवले आहेत. तपास यंत्रणा सीजेपीचे संस्थापक अभिजीत दीपके, सौरव दास आणि आशुतोष रांका यांची चौकशी करण्याची शक्यता आहे. आंदोलनादरम्यान पोलिसांवर झालेला हल्ला, वाहनांची तोडफोड आणि सार्वजनिक मालमत्तेची हानी यासाठी कोण जबाबदार होते, याचा शोध पोलीस घेत आहेत. तसेच, ही हिंसा नियोजित होती की बाहेरून आलेल्या समाजकंटकांनी घडवून आणली, याचाही तपास सुरू आहे. दरम्यान, सर्वोच्च न्यायालयाच्या निर्देशानंतर यापूर्वी दाखल केलेले 17 एफआयआर रद्द करण्यात आले आहेत.
दुसऱ्या बाजूला, सीजेपी मुख्य निवडणूक आयुक्तांविरुद्ध अधिक आक्रमक झाली आहे. दिल्लीत उतरण्यापूर्वी पक्षाने मुंबईतील प्रसिद्ध शिवाजी पार्कवर जोरदार निदर्शने केली होती. आगामी 10 ऑक्टोबरच्या आंदोलनासाठी पक्षाने परवानगी मागितली असता, जंतरमंतरवर आंदोलनासाठी किमान 10 दिवस आधी अर्ज करणे बंधनकारक असल्याचे पोलिसांनी स्पष्ट केले आहे.
नियमांची अडचण असूनही सौरव दास, आशुतोष रांका आणि अभिजीत दीपके आंदोलनाच्या तयारीत व्यस्त आहेत. त्यामुळे आगामी आंदोलनात काय घडणार, याकडे सर्वांचे लक्ष लागले आहे.
