लोणी काळभोर, ता. ११ : पुणे-सोलापूर महामार्गावर पुढील वाहनाने अचानक ब्रेक लावल्याने पोलो कारचालकाने वेळेत वाहन नियंत्रित केले. मात्र, पाठीमागून भरधाव वेगाने येणाऱ्या स्विफ्ट कारने अंतर न राखता जोरदार धडक दिल्याने पोलो कारचे मोठे नुकसान झाले. हि घटना लोणी काळभोर (ता. हवेली) ग्रामपंचायत हद्दीती माळी मळा परिसरातशुक्रवारी (ता. १०) दुपारी सुमारे तीन वाजण्याच्या सुमारास घडली आहे. अपघातानंतर सहप्रवाशाने कारचालकाला शिवीगाळ केल्याने वातावरण तणावपूर्ण बनले. या प्रकरणी लोणी काळभोर पोलिसांनी चालक व सहप्रवाशाविरुद्ध गुन्हा दाखल केला आहे.
त्र्यंबक शिवाजी काळे (वय ३८, रा. देलवडी, ता. करमाळा, जि. सोलापूर) व सहप्रवासी बाळासाहेब भानुदास मोरे (रा. देलवडी, ता. करमाळा, जि. सोलापूर) अशी गुन्हा दाखल करण्यात आलेल्यांची नावे आहेत. याप्रकरणी गौरव हरिदास बांडे (वय २४, रा. नंदिनी टकले नगर, मांजरी बुद्रुक, हडपसर) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गौरव बांडे यांच्या आजीचे ८ जुलै रोजी राशीन (ता. कर्जत, जि. अहमदनगर) येथे निधन झाले होते. अंत्यविधीनंतर ते वडील हरिदास बांडे आणि मावसबहीण रेश्मा अतुल दंडे यांच्यासह त्यांच्या भावाच्या मालकीच्या व्होक्सवॅगन पोलो (एमएच-१४ डीए-०३४४) या कारने पुण्याकडे परतत होते.
पुणे-सोलापूर महामार्गावरील राजेंद्र पेट्रोलपंपासमोर, माळी मळा (लोणी काळभोर) येथे समोरील वाहनाने अचानक ब्रेक लावल्याने गौरव बांडे यांनीही तत्काळ ब्रेक दाबून वाहन नियंत्रित केले. मात्र, पाठीमागून येणाऱ्या मारुती सुझुकी स्विफ्ट (एमएच-४२ बीएन-९४१२) या कारच्या चालकाने सुरक्षित अंतर न राखता भरधाव वेगात वाहन चालवून पोलो कारला पाठीमागून जोरदार धडक दिली. या धडकेत पोलो कारचा बंपर, बॉनेट तसेच इतर भागांचे मोठे नुकसान झाले.
अपघातानंतर स्विफ्टमधील सहप्रवासी बाळासाहेब मोरे हा खाली उतरून फिर्यादी गौरव बांडे यांना अपघातासाठी जबाबदार धरत शिवीगाळ करू लागला. त्यानंतर गौरव बांडे यांनी तातडीने डायल ११२ वर संपर्क साधून पोलिसांना घटनास्थळी बोलावले. पोलिसांनी घटनास्थळी पंचनामा करून दोन्ही वाहनांची पाहणी केली. फिर्यादीच्या तक्रारीवरून त्र्यंबक काळे या स्विफ्ट कारच्या चालकाविरुद्ध निष्काळजीपणे वाहन चालवून अपघात घडविल्याप्रकरणी, तसेच सहप्रवासी बाळासाहेब मोरे याच्याविरुद्ध शिवीगाळ केल्याप्रकरणी लोणी काळभोर पोलीस ठाण्यात गुन्हा दाखल करण्यात आला असून, पुढील तपास पोलीस करत आहेत.
