पुणे: पुणे महानगरपालिकेने (PMC News) शहरातील मालमत्ता कर थकबाकीदारांना मोठा दिलासा देणारा निर्णय घेतला आहे. अनेक वर्षांपासून प्रलंबित असलेल्या कर थकबाकीच्या वसुलीसाठी पालिकेने ‘अभय योजना’ (PMC Abhay Yojana) जाहीर केली आहे. या योजनेत थकबाकीदारांना दंडाच्या रकमेत 75 टक्क्यांपर्यंत सूट देण्यात येणार आहे.
योजनेचा कालावधी
ही योजना 15 नोव्हेंबरपासून सुरू होणार असून 31 जानेवारी 2026 पर्यंत लागू राहणार आहे. या कालावधीत मिळकतदारांना थकबाकी भरण्याची संधी मिळणार आहे.
थकबाकीची स्थिती का?
महापालिकेची नागरिकांकडे मिळकतकराची एकूण 12 हजार कोटी रुपयांची थकबाकी आहे. यात मूळ मिळकतकराची रक्कम 3,158 कोटी रुपये असून, त्यावर दंडाची रक्कम सुमारे 9 हजार कोटी रुपये आहे. या थकबाकीवर दरमहा 2 टक्के व्याज आकारले जात असल्याने ही रक्कम मोठी झाली आहे.
अभय योजना काय?
या योजनेचा उद्देश थकबाकीदारांना प्रोत्साहन देऊन महसूल वाढवणे आणि त्यांना दंडाच्या ओझ्यातून मुक्त करणे हा आहे. जे नागरिक आपला मूळ कर पूर्ण भरतील, त्यांना थकबाकीवरील दंडाच्या रकमेत 75 टक्क्यांची माफी मिळणार आहे. थकबाकीदारांना मूळ कर आणि उर्वरित 25 टक्के दंड भरावा लागेल. ही योजना निवासी आणि व्यावसायिक अशा सर्व मिळकतदारांना लागू होईल.
या योजनेमुळे महापालिकेला सुमारे 150 कोटी रुपयांचा महसूल मिळण्याची अपेक्षा आहे. आर्थिक अडचणीमुळे कर न भरू शकलेल्या अनेक करदात्यांसाठी हा निर्णय मोठा दिलासा ठरणार आहे.
