Government Job Scam : भंडाऱ्यातून सरकारी नोकरीच्या नावाखाली मोठा घोटाळा समोर आला आहे. जिल्हा परिषदच्या आरोग्य विभागात आरोग्य सेवक या पदावर नियुक्ती मिळवून देण्याच्या आमिषाने काही तरुणांकडून प्रति उमेदवार तब्बल 15 लाख रुपये घेतल्याचं समोर आलं आहे. या रकमेच्या बदल्यात उमेदवारांना बनावट जॉइनिंग लेटर देऊन त्यांची फसवणूक करण्यात आली. पोलिसांनी या प्रकरणात तीन जणांना अटक केली असून या रॅकेटमध्ये आणखी काही जण सामील असल्याची माहिती समोर आली आहे.
विजय यावलकर आणि त्याच्या साथीदारांनी जिल्हा परिषदच्या आरोग्य विभागात आरोग्य सेवक पदावर नोकरी मिळवून देण्याचं आमिष दाखवून अमरावती जिल्ह्यातील दर्यापूर तालुक्यातील काही तरुणांकडून 15 लाख रुपये घेतले. संबंधित उमेदवारांना बनावट जॉइनिंग लेटर देऊन भंडाऱ्यात रुजू होण्यासाठी सांगण्यात आलं. मात्र, जेव्हा हे तरुण नोकरीसाठी भंडाऱ्यात आले, तेव्हा त्यांना ही सर्व कागदपत्रं खोटी असल्याचं लक्षात आलं आणि त्यांची फसवणूक झाल्याचं उघड झालं.
या घटनेनंतर पीडितांनी दर्यापूर पोलीस ठाण्यात या फसवणूक रॅकेटविरोधात तक्रार दाखल केली. तक्रारीनंतर दर्यापूर पोलिसांनी विशेष पथक तयार करून आरोपींचा शोध सुरू केला. पथकाने सापळा रचून विजय यावलकर आणि त्याच्यासोबत असलेल्या पुण्यातील एका साथीदाराला भंडाऱ्यातून अटक केली. पोलिसांनी आरोपींकडून आरोग्य सेवक पदासाठी बनावट जॉइनिंग लेटर, अधिकाऱ्यांचे बनावट शिक्के आणि अन्य कागदपत्रं जप्त केली आहेत.
या कारवाईनंतर भंडारा जिल्हा परिषद प्रशासनात आणि आरोग्य विभागात मोठी खळबळ उडाली आहे. प्राथमिक तपासात असे रॅकेट काही दिवसांपासून सक्रिय असल्याची माहिती मिळाली आहे. आरोपींनी सरकारी नियुक्त्यांची प्रक्रिया आणि शिक्क्यांची बनावट नक्कल करून उमेदवारांचा विश्वास संपादन केला होता. पोलिसांनी या प्रकरणात आणखी काही लोकांचा सहभाग असल्याचा संशय व्यक्त केला आहे.
अमरावती पोलिसांनी सांगितलं की, विजय यावलकर हा भंडाऱ्यातून अटक केलेला मुख्य आरोपी असून, पुण्यातील दुसऱ्या आरोपीचं नाव तपासाच्या कारणास्तव सध्या जाहीर करण्यात आलेले नाही. या रॅकेटमधील इतर सदस्यांचा शोध सुरू असून, लवकरच त्यांनाही अटक केली जाईल. सरकारी नोकरीच्या नावाखाली तरुणांकडून लाखो रुपये उकळणाऱ्या या रॅकेटमुळे अनेकांचे स्वप्न उद्ध्वस्त झाले असून, पोलिसांनी पुढील तपास अधिक गतीमान केला आहे.
